Rhuggenaath a reacciona riba habrimento di frontera entre Venezuela y solamente Aruba

Tin un solo frontera y esey ta entre Reino y Venezuela. No ta papia aki di un frontera apart entre Aruba y Venezuela.

Esaki ta segun prome minister Eugene Rhuggenaath di Corsou hunto cu Reino riba e anuncio di e vicepresidente y minister di Asuntonan Economico di Venezuela, Tareck El Aissami, cu e fronteranan entre Venezuela y Brazil y tambe cu Aruba entrante diabierna, a keda habri “riba instruccion di presidente Nicolas Maduro.”

E fronteranan cu Colombia, pero tambe cu Corsou y Boneiro ta keda cera. Na Februari, Maduro a blokia trafico cu e islanan ABC, Brasil y Colombia na momento cu e lider opositor Juan Guaido a autoproclama como presidente encarga te ora cu tene eleccionnan nobo, a purba di ingresa ayudo humanitario na Venezuela.

Rhuggenaath, pa e motibo aki a stem af cu Asuntonan Exterior na Den Haag, enfatisando cu un solo frontera ta conta pa tur e paisnan den Reino. Fuera di esey segun Rhuggenaath, Reino no por haci nada riba e base di un aviso oral. “Pa loke ta trata nos, e frontera por lo tanto ainda ta cera,” e prome minister di Corsou a bisa, kende a agrega cu “esaki ainda ta wordo resolvi.”

“Nos kier un region fronteriso pacifico,” El Aissami a bisa den un discurso televisa diabierna prome cu merdia. E ta critica e “intentonan di intervencion” pa “destabilisa” dia 23 di Februari y ta considera cu e papel di Reino ta “provocativo.”

Ta bisa cu e lasonan cu Brasil a wordo restaura. Y den un aparente of posibel intento di dividi y goberna cu respecto e islanan di Caribe Hulandes, solamente autoridadnan di Aruba a ricibi un compromiso di “respet, solidaridad y cooperacion.”

El Aissami hasta a yama “en particular e prome minister di Aruba”, Evelyn Wever-Croes (MEP), kende lo mester a enfatisa cu ta trata di “asuntonan interno (Venezolano).”

Esaki no ta aplica na e otro dos islanan, e vicepresidente a bisa. Y pa esey nan ta nombra Corsou y Boneiro.

Cu respecto Aruba, lo haci un trabao di inmediato pa reestablece e relacionnan. Por ehempel, e comitenan por traha y El Aissami a declara cu Venezuela lo reanuda e “48 vuelonan semanal” pronto. E gobierno di Maduro kier “aumenta” e inversionnan den petroleo na Aruba y a señala e importancia di esaki pa e isla, cu segun e, ta depende den gran medida di e comercio entre e dos paisnan.

A acorda cu Brasil y Aruba cu lo “respeta e soberania di Venezuela.” E paisnan tambe lo a priminti cu nan no lo interferi cu “asuntonan cu mester wordo regla pa e Venezolanonan.”

Como cu tin un frontera, tambe tin un solo politica exterior cu ta wordo aplica pa e cuater paisnan di Reino: Hulanda, Corsou, St. Maarten y tambe Aruba.

E relacionnan exterior ta un asunto di Reino, den e caso di Minister Stef Blok (VVD), kende a bishita Willemstad y Oranjestad recientemente, despues di un consulta conhunto na Philipsburg.

E vicepresidente Venezolano a declara den un sentido general cu e blokeo lo wordo manteni te ora cu “e actitud di hostilidad y agresion stop di existi.” E blokeo cu Corsou y Boneiro ta referi na e trafico maritimo y aereo y e fronera cu respecto Colombia, lo keda cera.

Direpente e islanan ABC ta bolbe bira noticianan mundial. Tanto e agencianan di Reuters como Associated Press (AP), pero tambe New York Times y naturalmente, e medionan Hulandes, a informa al respecto. “Nos ta spera cu sabiduria prevalece entre e autoridadnan die otro islanan,” AP ta cita e minister Venezolano. “Y evita cu nan converti den instrumentonan di agresion contra e teritorio di e Republica Bolivariana di Venezuela.”

Na Corsou tin e suministronan Mericano di ayudo humanitario cu Maduro no kier tin na Venezuela. Colombia a yuda na e intento di Guaido di lansa un campaña di ayudo di emergencia, despues cual Caracas a suspende tur vinculo cue pais.

Guaido a proclama na Januari como presidente interino di Venezuela. Merca a reconoce casi di inmediato como e lider legitimo di e pais y den e dia y simannan posterior, decenas di pais a sigui den su mayoria occidental, incluyendo Reino, pero tambe e mayoria di e paisnan Suramericano uni den e Grupo de Lima.

 

Comments

comments