Pa falta di quorum den sala di parlamento, e reunion awe mainta organisa pa 9:00am a start por lo menos un ora mas laat. Parce cu un miembro di MEP y un miembro di POR no tabata presente y como tal coalicion no tabatin mayoria pa e reunion y a opta pa wanta. Na dado memento a dicidi pa toch continua cu e reunion. Mester menciona cu e reunion a ranca sali cu discusion.
Na apertura di e reunion, a participa cu Minister Andin Bikker lo t’ey tambe den e reunion. Aunke e no tabata invita di un principio, e Presidente di Parlamento a bisa cu el a invit’e como cu a bisa algun asunto den e prome tanda. Fraccion di AVP no tabata contento cu e movecion aki y a splica Presidente di Parlamento cu reglamento di ordo di Parlamento no ta permiti esaki. Asina mes el a opta pa, den cuadro di transparencia, pa laga Bikker ta presente.
Tin hopi interes awe pa e reunion aki, pa cual 24ora.com lo transmiti henter e reunion riba nos Facebook y riba nos website. Cada parlamentario, cu a inscribi nan nomber caba den prome tanda, un tempo di 10 minuut disponibel pa nan por hiba palabra. Despues e ministernan por hiba palabra pa despues por duna remarkenan na final pa despues vota. Cu si e mocion di desconfiansa lo bin ainda, no ta conoci, pasobra a yega na paz entre POR y Marisol Lopez-Tromp.
