Corte a haya cu Dienst Publieke Scholen tabatin suficiente motibo pa retira un docente cu nan a descubri a comete fraude di examen cu e materia di matematica (Wiskunde). E caso aki a tuma luga aña pasa na scol anochi y ora cu el a wordo descubri, a cuminsa e proceso di investigacion cu a culmina den suspension y retiro di e docente en cuestion.
E docente cu no tabata di acuerdo cu e decision di su doño di trabou, a dicidi di bay Corte y cual decision no tabata na su fabor. Hues a rechaza su peticion, basa segun e cu no tin prueba di nada. Corte a conclui cu su doño di trabou tabatin motibo hustifica y di peso pa retir’e ya cu el a viola regla y normanan di su trabou, poniendo cara di e doño di trabou y e sector na berguensa.
Dia 16 di juni 2017 e Director di Openbare Avondleergangen a manda un carta pa Inspector di Enseñansa cu e tema: “Fraude durante CSE-Wiskunde 1ste tijdvak”. E caso aki ta envolvi un studiante, kende durante e prome testnan (di ultimo aña di Avond MAVO a score 2.5 y 3.8 y den e ultimo test el a saca un 9.0 y pa su examen el a saca un 7.4 pa alcansa e cifra final di 6.
A bin descubri e fraude ora cu a mira un diferencia entre loke e director y un docente di wiskunde a coregi y loke e docente envolvi den e fraude a entrega despues. A base di esaki a tuma un medida di prohibi e docente di subi tereno di scol y e instalacionnan di Colegio EPI.
E docente a topa cu e studiante cu el a yuda den oranan di anochi y a entregue e formulario di examen (original) bashi hunto cu un otro papel riba cual ta aparece e contestanan cu e docente a skirbi. Esaki pa yud’e cu e examen, y cu e lo uza e version coregi di e di dos documento aki y no esun entrega na scol durante e examen. E mesun dia e studiante a yena e contestanan pa e siguiente dia entrega esaki bek na cas di e docente.
Dia 21 di juni ora cu a bay controla e examennan original a constata cu e papelnan di un studiante no ta den e envelop y despues a haya esaki for di e colega. E studiante mes a declara cu e docente a aserke bisando cu e lo yude cu SO 3, cual resultado el a cambia, unda e studiante diripiente a haya un 9. Despues el a ofrece e studiante pa yud’e tambe den e “Centraal Schriftelijk Examen”, door di cambia e examennan. Hasta el a bisa e studiante cu el a yega di yuda un otro persona caba cu tabata bay MAVO anochi y otro di EPI.
Su doño di trabou despues di investigacion a inform’e cu el a haci su mes culpabel na “examen fraude”, forma di anda indebido cu studiantenan femenino y cu el a keda cu documentonan di SO3 di Wiskunde. Nan a yega na e conclusion cu el a mancha of causa daño na integridad y confiansa di Dienst Publieke Scholen, pais Aruba y por lo tanto no ta apto pa sigui haci su trabou como docente cerca nan.
Hues ta di opinion cu e doño di trabou tabatin motibo hustifica pa conclui cu el a viola e reglanan y solamente mester evalua si e castigo disciplinario, retiro incondicional, ta na su luga den cuadro di e indole di e violacion y e seriedad. Corte ta opina cu mirando e seriedad di e sucedido y e reglanan pisa cu e doño di trabou ta pone pa confiabilidad y integridad di su docentenan, no ta haya e medida inhusto.
Corte a dicta na final:
“Loke el a haci ta hopi serio, el a viola e confiansa deposita den dje. Profesion di docente ta pa duna ehempel. Pues no tin desbalance entre e hecho cometi y e castigo imponi”.
