Dialuna atardi algo pasa di 5:00pm, Su Mahestad Reina Maxima Zorreguieta a yega San Francisco California abordo di e avion real PH-GOV. Su bishita no lo ta solamente na San Fransisco, pero tambe e lo bishita Austin y Houston, Texas. Den e bishita real aki, Aruba tambe lo ta representa.
Durante diferente sesion Minister Geoffrey Wever y Minister Dangui Oduber tambe lo atende como parti di e delegacion di reino Hulandes.
Dialuna atardi e avion a aterisa na Aeropuerto Internacional di San Fransisco y un delegacion encabesa pa Gobernador di California y e otro representantenan di Reino. Abordo di e buelo tabata tin tambe Minister Kuipers cu ta Minister di Salubidad Publico di Hulanda.
Cu hopi siguridad y protocol, Su Mahestad a sali rumbo pa su hotel. Aki e lo descansa pa cuminsa cu un programa hopi intensivo durante e siguiente cinco dianan.
E temanan principal di e biahe ta e cambio climatico, salubridad, mobilidad y economia. Su Mahestad tin un agenda hopi yen unda cu e lo ta na San Fransisco pa dos dia. Despues e ta sigui pa Austin,Texas pa un dia y e lo clausura e biahe na Houston, Texas.
Paralelo cu e bishita real aki, tin un mision comercial entre Merca y Hulanda tumando luga. Mas di 100 compania Hulandes a biaha pa Merca pa intercambia idea y stimula comercio entre e paisnan.
24ora.com ta presente na California y Texas pa asina trece un cobertura amplio di e bishita real y cu enfasis riba e presencia di Aruba formando parti di e delegacion Hulandes.
