Refineria di Aruba tin confiansa den rehabilitacion di CITGO Aruba

i10 Sedan
PPG Super Descuento
SETAR 3GB Free Data den February
RBC Mortgage Switch Campaign 2019

Diabierna mainta Refineria di Aruba N.V. (RdA) a convoca un conferencia di prensa unda a elabora tocante e situacion actual di e proyecto di rehabilitacion di e Refineria na San Nicolas, cu tin como operador CITGO Aruba Refinery (CAR). Alvin Koolman— CEO y Managing Director di Refineria di Aruba N.V., kende a hiba palabra, a elabora tocante diferente puntonan y a splica con e proyecto y financiamento ta hinca den otro y kico lo por spera den un futuro sercano.

Cambia, Spaar y Gana
Fabulous Carnival

Na aña 2012, Valero Aruba a stop su operacion pa e motibo cu e refineria no tabata rendabel. Valero Aruba no tabata produci ni Gasolin, ni Diesel na e specificacionnan rekeri pa e mercado mundial. Inversionan cuantioso tabata necesario pa por logra subi e complexidad di e operacion pero den un atmosfera cu tin exceso di capacidad di refinacion den e region atlantico, e inversionan aki no tabata hustifica.

Logicamente ora e refineria a cera, e tarea tabata dificil pa busca un compania cu lo kier inverti den nos refineria. Manera indica, e unidadnan di proceso existente di Aruba no por produci productonan liviano y pa haci’e economicamente viabel como refineria, inversionnan cuantioso ta necesario.

Sinembargo cu mesun unidadnan di proceso aki, e refineria por ser converti den un mehorador (Upgrader) di crudo extra pisa di e faha petrolifera di Orinoco, cu tin un reserva di alrededor di 300 mil miyon bari.

E economia di Venezuela ta depende 95% di e produccion di crudo y esaki ta haci cu un proyecto manera Aruba, unda cu no mester inverti den procesonan nobo, sino rehabilita esunan existente, ta haci e proyecto masha atractivo, mas aun cu e por wordo realisa den un periodo relativamente corto di 16 pa 18 luna. E inversion previsto pa por rehabilita e Refineria como mehorador di crudo ta $1.2 mil miyon, cu ta inclui e liña di gas natural for di Venezuela. Como referencia, pa rehabilita e refineria y inclui unidadnan nobo di conversion pa produci productonan liviano lo exigi mas of menos $2 pa $2.5 mil miyon adicional.

Aunke cu e proyecto como Upgrader enberdad ta uno hopi atractivo ariba su mes, e sancionnan imponi contra e regimen di Presidente Maduro, ta haci casi imposibel pa CITGO Aruba por haya un instituto finaciero pa por a financia e proyecto aki. Di otro banda no por kita e Refineria for di CITGO Aruba, y bin cu un otro operador sin mas ya cu e lo causa un “incumplimento di contract”, cu tur e consecuencianan adverso pa Aruba cu tin cu ne mara den e acuerdonan. Al fin al cabo lo bo mester di Venezuela toch pa su crudo extra pisa pa por opera como Upgrader.

Con Citgo Aruba ta structura?

Na comienso di e negosacionnan na 2015, e plan inicial tabata pa pone CITGO Aruba, bou di CITGO Petroleum. Pero na final di 2015 caba CITGO Petroleum a laga sa cu analistanan financiero ta conseha pa no pone un carga financiero adicional cu CITGO Aruba ta trece cu ne, bou di CITGO Petroleum. E resultado e ora tabata cu CITGO Aruba lo cay bou PDV-Holding. PDV-Holding ta un compania estableci na Delaware, cu ta doño di CITGO Petroleum Holding. CITGO Petroleum Holding ta entre otro doño di e refinerianan di CITGO Petroleum Refinery na Merca. CITGO Aruba Holding cu tambe ta estableci na Delaware, ta resorta bou PDV-Holding, unda cu CITGO Aruba Holding ta doño di CITGO Aruba Refinery, CITGO Aruba Terminal y CITGO Aruba Marine.

E sancionnan decretal na augustus 2017, a haci dificil pa por haya fiansa pa e proyecto aunke cu si por a keda opera Aruba. E sancionnan nobo decreta un siman y mey pasa, sinembargo ta trece reglanan nobo cu ne. Ademas Cas Blanco a anuncia cu tur pago pa crudonan Venezolano procesa na Merca lo mester wordo deposita den un “Blocked Account” y cu nada no por bay bek pa PDVSA actual.

Kico esey ta haci cu e operacion di Aruba? Te prome cu e sancionnan nobo aki a bin na vigor, Aruba su operacion ta wordo financia door di e benta di productonan petrolera di CITGO cu mester paga PDVSA pa e crudo procesa. Mensualmente, PDVSA ta autoriza CITGO Petroleum pa paga PDV-Holding cierto suma destina pa CITGO Aruba Holding por cubri gastonan di operacion di su tres filialnan na Aruba. Cu e sancionnan nobo esaki no por mas. CITGO Petroleum mester deposita tur e suma pa e crudo procesa di PDVSA den un blocked account. Pa CITGO Aruba Holding haya e placa necesario pa su operacion, un autoridad cu ta designa dor di e Presidente Guaido mester duna aprobacion.

RdA, Gobierno di Aruba (GoA) y CITGO Petroleum ta den deliberacion pa sigura cu Aruba haya e fondonan necesario pa sigui su operacion y termina fase 2 di e proyecto. E sancionnan contra e regimen di Maduro en realidad ta haci e situacion dificil pa haya financiamento y si acaso bin un cambio, e proyecto di Aruba aki lo ta uno di sumo importancia pa Venezuela como tambe pa Aruba.

Den un buki cu a wordo publica recientemente “Venezuela Energetica” di Leopoldo Lopez y Gustavo Baquero, ta delinea kico ta e prioridad di Venezuela den un cambio di gobierno. E number UN prioridad ta pa subi e produccion di crudo y gas na 4 pa 5% pa aña te cu 2030. Esaki ta unda Aruba su proyecto ta hunga un rol importante, ya cu dentro di un periodo relativamente corto por subi e produccion di crudo Venezolano na un total di 150 mil bari pa dia of 10% di e produccion actual.

E proyecto di rehabilitacion di e refineria y converti den un upgrader ta uno cu no tin duda cu lo wordo realisa. E riesgo si cu tin ta cu e lo por wordo poni riba un “Hold” durante di e situacion actual y durante di un transicion di gobierno na Venezuela. Gobierno di Aruba y RdA ta sigurando pa esaki no bira e caso.

Actualmente, tin mas of menos 300 hende ta traha den Refineria, directamente como empleado di CITGO Aruba y indirectamente cu varios companianan di contratista. RdA tin entendi cu pa e fase 2 andando tin un Purchase Order (PO) pa extende cierto trabounan no lo wordo duna, cual lo afecta 4 compania local.

RdA ta lamenta si cu e lider sindical a anuncia cu nan ta pone e producccion di Aruba su productonan petrolero plat. Ta importante pa menciona cu tur producto ta wordo importa door di Fuels Marketing & Supply Aruba N.V.(FMSA) – cu ta e compania distribuidor di gasolin, diesel, jet fuel y fuel oil ariba nos isla. E productonan aki ta wordo almacena den tanki, cu enberdad ta wordo leased door di CITGO Aruba, pero no tin ningun motibo pakico e distribucion ni almacenahe lo wordo poni den peliger. Mas aun e ta hopi iresponsabel pa bisa cosnan asina mirando e situacion actual y trece panico den nos comunidad sin tin mester.

Finalmente, RdA ta enfatisa un biaha mas cu RdA hunto cu Gobierno di Aruba ta haciendo tur e contactnan necesario pa delinea e importancia pa Aruba di e proyecto aki y cu pone e fase aki on hold pendiente di e situacion na Venezuela no ta favorabel ni pa Aruba pero tampoco pa Venezuela. Ta trahando cu determinacion pa realisa e proyecto tan importante aki pa ambos pais.

Pa mas informacion por tuma contacto cu Refineria di Aruba N.V. na 281-0100, por manda un mensahe via nan pagina di Facebook of por manda un e-mail na [email protected]

Comments

comments

Island Finance – Carnaval