Algun siman atras a entrega Presupuesto 2024 na Parlamento y a bisa cu lo no haci cambionan drastico den esaki.
Pero si lo bin c’un nota di cambio pa loke Aruba lo mester paga na Hulanda na interes, cu awor ta poni na 3.5%. E nota di cambio ta encera e adaptacion pa cu e porcentahe nobo di interes a base di cual lo haya e prestamo pa refinancia Aruba su debe.
Prome Minister mr. Evelyn Wever-Croes a bisa cu pais Aruba tin suficiente entrada cu e lo por carga e 10 miyon florin adicional cu ta bini di e porcentahe diferente di interes.
Mientras cu Gobierno ta papia di 10 miyon, e gremionan ta papia di 30 miyon, cual ta un diferencia di 20 miyon florin.
Segun e mandatario, esaki ta e diferencia di interes. Pa loke ta e discrepencia den cifra, e mandatario a bisa cu tin tres sorto di porcentahe:
– Tin esun di 3% cu ta loke Hulanda mes ta presta
– Tin esun di 5% cu ta loke Hulanda ta ofrece p’e proximo dos añanan
– Tin esun di 6% cu ta si Aruba mes bay prest’e riba mercado internacional of Hulanda presta Aruba sin e RAft.
Es decir tin 3, 5 y 6, pero e gremionan como tambe algun miembro di oposicion eroneamente ta compara e 3 cu 6.
Pero e 3 no ta ariba mesa aworaki. entre e 3 cu e 6, e diferencia ta mas o menos 30 miyon pa aña. Loke mester wak ta e diferencia entre 5 y 6, cu ta loke Hulanda ta ofrece awo, te ora cu Rijkswet keda cla, si e bin.
Por ultimo, Prome Minister, mr. Evelyn Wever-Croes a indica cu entrada di pais Aruba ta bayendo asina bon, cu facilmente e lo por carga e 10 miyon florin aki di interes, cu Aruba lo mester paga bek na Hulanda.
