Diasabra anochi RCA a logra haci un comeback y gana e Savaneteronan di La Fama 4-2. Ronald Gomez ta anota 2 biaha, Jeanpierre Fingal y Diqion Ras tambe ta anota. E victoria ta hiba RCA na 25 punto y #5 ribe tabla Divishon Honor faltando ainda dos wega. E proximo ta e GRAN CLASICO di CAPITAL, diadomingo venidero 8or di anochi den CDGPT unda Soldatnan Tricolor di Solito lo topa Rioplatense di Playa Pabou Riverplate. Un encuentro cu ya pa casi 30 aña ta un bataya formal. Fanaticada Tricolor yega stadion y ban hunto pa 3 punto.
Tambe directiva ta haci un invitacion na e famia tricolor pa yega Club diabierna 27 di april “dia di Rey” for di 9or mainta unda RCA ta bolbe celebra otro “John Merryweather Cup” honrando unbes mas un miembro di Honor cu tur dia ta na Club. Un total di 85 mucha di RCA entre 4 y 11 aña lo bataya cu otro den e formato 5 contra 5, representando paisnan den Mundial 2018, manera Inglatera, Peru, Alemania, Brazil, Spaña, Colombia, Portugal y Argentina. Lo tin mesa di domino, Bar y Cushina ta bon surti y cu cuminda crioyo. Ambiente ta den man di DJ MCK powered by HP. Probecha di biaha y cumpra bo jersey RCA pa Bida.
