Diabierna dia 29 di November 2019, Amy Richards a bira e di 5 studiante di Organization, Governance and Management cu a ricibi e RBC-SETAR Thesis award. A selecta Amy pa e prestigioso premio di RBC-SETAR pasobra su tesis ta bon structura, cla, concreto hunto cu un cuadro teorico profundo.
Srta. Richards a ricibi e premio den un Aula di Universidad di Aruba completamente yen den e ceremonia anual di Student Awards. Amy a ricibi un cheque for di RBC Royal Bank (Aruba) N.V. y un regalo for di SETAR. Sra. Farah Hardeveld, representante di RBC Bank y Sra. Andreina Kock representante di SETAR a haci entrega di regalonan aki.
E proposito di Amy su tesis tabata pa studia e proceso di implementacion di e maneho publico ‘Sociale Crisis Plan 2017-2020’ pa asina por tin un miho bista riba obstaculonan y factornan stimulante adhunto e implementacion di e maneho publico aki. Adicionalmente, pa descubri con e resultadonan planea di e segundo secuencia, cual ta pone atencion ariba e eliminacion di e lista di espera cu ta acumula mientras ta warda pa ta procesa y ricibi guia oportuno den caso di crisis social, por ta haci den e miho manera segun es involucra. E miho bista aki ta pa contribui na e eficacia di e maneho publico aki y futuro proceso di maneho na Aruba. Amy ta afirma cu e investigacion aki ta necesario pa asina por traha exitosamente pa mehora e calidad di bida di e comunidad Arubano.
Universidad di Aruba, particularmente e departamento di ‘Organization, Governance and Management’, ta felicita Amy cu e logro aki y ta desea e tur clase di exito den su carera profesional. Tambe ta gradici RBC y SETAR pa nan contribucion pa cu e Thesis Award. Pa mas informacion riba e estudio OGM, bishita e website di Universidad di Aruba na http://www.ua.aw/OGM y e pagina di Facebook cual ta https://www.facebook.com/pages/University-of-Aruba-OGM-Organization-Governance-Management-FAS/
