Randall Luidens su exito nobo: Museo di Amor

308

Randall  Luidens a expresa cu ‘Museo  di  Amor’ ta  hiba  un  genero  no  mucho
conoci  aki  na  Aruba . Sinembargo , e  ta  considera  e genero Slow – jam R & B  uno hopi expresivo, dunando e cantante e espacio  pa expresa su mes di un forma mas poetico. E artista a indica cu e letranan di Museo di  Amor ta referi na un persona su experencianan di pasado y con esaki no  mester bira un peso riba su lomba ,sino algo di celebra,  mirando cu esaki ta haci cada persona ken e ta.

E  cancion, mescla y maestra pa  Sean Cannister, ta compaña pa un tremendo videoclip dirigi pa e talentoso  Michael Fowler cu concepto di entre otro Randall Luidens, Elai Petronia, Hilyann Croes y Michael Fowler .  

Luidens a menciona cu tabata  un grupo grandi di persona cu a haci e video clip aki  posibel, incluyendo Ricardo Quezada, Marc Anthony Pablo, Luis van der Linden, Cady Henriquez, Laura Kock, Jennerick van der Linden, Heleeny Jansen y Daniela Sanchez.

Ademas, esaki tabata e prome biaha despues di hopi tempo cu Randall Luidens a lansa  un  produccion riba su  propio canal di youtube titula ‘Team POV’. E cantante ta invita tur su fanaticonan pa subscribe na su canal di youtube ,  mirando   cu por spera mas produccion riba  e canal aki.

Cu esaki, Randall Luidens ta duna inicio na  promocion di su proximo proyecto cu pronto lo     ta riba mercado titula ‘Perspectiva2’. E artista splica cu despues di varios aña trahando riba su formacion artistico, e ta bay bek na     comienso di su carera musical. Cu e produccion aki e lo enfoca riba e aspecto di  musica cu ta mas cerca na dje, cual ta e habilidad di expresa su pensamentonan y sentimentonan honestamente.

Pues, pronto lo por  spera mas produccion di Randall Luidens. Pa keda na  altura di kico tur e    artista tin   prepara pa    e temporada aki, por sigui Randall Luidens     riba su rednan social.
Facebook : Randall Luidens    
Instagram : Randall Luidens   Youtube : Team POV