Bou di liderato di e pianista Randal Corsen su orkesta ta traha tur-ku-tin riba diferente piesa nobo ku nan lo subi merkado kuné den final di e aña aki, kuminsando djaluna dia 29 di òktober ku e promé, titulá Dushi sintimentu.
Esaki ta un piesa den estilo di ritmo-kombiná, pero tòg ku un toke hopi diferente. E ta un ko-produkshon di Randal Corsen i e kantante Dibo D ku a produsí e letranan tambe, i klaro e mes ta interpretá e piesa aki tambe.
Na 2016 a forma Randal Corsen Orchestra (RCO) i su promé presentashon tabata bou di e nòmber RC Bigband durante e konsierto grátis na Awasá pa klousurá e selebrashonnan di e di-100 aniversario di Banko Maduro. Despues di esaki RCO tabatin vários presentashon eksitoso mas, na evento manera Salsa de Los Bravos, Paranda Di Fin Di Aña, Kosecha Kultural, Jump In di Lions, pa djis menshoná algun.
Produkshonnan nobo
Despues ku RCO a kuminsá presentá prinsipalmente temanan klásiko popular di Kòrsou, ku Randal Corsen tabata hinka den un bachi nobo, aña pasá RCO a lansa su promé tema propio i original. Esei tabata e tumba Henter Aña Den Paranda, interpretá pa e tres kantantenan di RCO, ku ta Dibo D, Rich Pieter i Yumarya Grijt. E último aki tabata ko-outor di e piesa huntu ku Randal Corsen. E tema a hasi furor durante fin di 2017 i a demostrá ku RCO por trese su temanan original tambe.
E aña aki RCO ta trahando riba por lo ménos 5 piesa original mas, di kua tres di nan lo sali pronto riba merkado. E promé ta un tema den e género di ritmo kombiná interpretá pa Dibo D, ku huntu ku Randal Corsen ta ko-outor di e komposishon nobo aki. E otro temanan ku ta bai zona pronto ta un salsa, interpretá pa Yumarya Grijt, otro komposishon di Yumarya huntu ku Randal, i un tumba interpretá pa Rich Pieter, ku ta un komposishon di Randal ku letra di Dibo D. Randal Corsen a perkurá pa e areglo di tur e temanan aki, miéntras ku Oscar Bor ta esun responsabel pa e grabashonnan.
Konsiertonan pendiente
Aparte di esaki RCO tin tin mas den tapara. Na su debido tempu lo divulgá kiko esei ta. Pa awor aki por anunsiá ku dia 4 di novèmber awor RCO lo presenta na Waaigat durante klousura di e evento Duck Race di Rotary Club. Tur hende por bin presensiá e konsierto aki ku lo tuma lugá di 18:00 pa 19:00. Pronto lo anunsiá detaye di e konsierto anual Paranda di Fin Di Aña ku e aña aki ta bai selebrá su di sinku aniversario na Brakkeput Meimei. Mas ku klaro ku e temanan nobo di RCO lo zona durante e presentashonnan aki tambe.
