Ya for di siman pasa, tabatin un antesala pa loke ta Bonaire Regatta, cuminsando cu e parti di entretenimento durante Keinta Kaya, cu a tuma luga na Parke Wilhelmina.
Y e diversion ta sigui e siman aki, cu un programa basta amplio cuminsando di diaranson cu un lineup hopi interesante y hasta por bisa cu algun artista local cu a bin Boneiro specialmente pa duna un presentacion durante e Regatta.
Pa awe diahuebs, lo tin entre otro Loutiza Raven y pa diabierna Buleria hunto cu Claudius, lo t’ey hunto cu un arsenal di artista cu lo deleita e publico riba escenario den Parke Reina Wilhelmina.
Fo’i Corsou tabatin riba escenario diamars e conocido Boy Thode y Era cu, manera e imagennan mes por papia, a bolter Parke Reina Wilhelmina boca abao.
Diasabra e festival ta culmina cu un Boat Party na dos localidad, cu presentacion magistral di entre otro Irsais, Chris Strick for di mainta te pasa di 2:30 am.
Organisado di evento durante Bonaire Regatta, Jiwan Gonesh, a conta cu e prome dia, esta diaranson, tabata yen yen. Tur stand tabata contento. Era a buta un drama, el a comenta. E tabata un ambiente total.
Pa loke t’e dianan venidero, Gonesh a conta cu cuminsando awe, tin Loutiza Raven cu su Celebration Band for di Aruba, clausurando e dia. Tambe lo tin e bandanan local cual lo habri e anochi.
Pa diabierna lo tin Buleria hunto cu Claudius, cu lo cera e anochi diabierna. Pa diasabra lo tin Irsais fo’i Hulanda cu su banda completo. E lineup e aña aki ta uno bon y naturalmente tin un sorpresa pa diasabra anochi, pero esaki ta keda un secreto, aunke el a divulga cu e artista ta di Boneiro pero ta biba den exterior y hopi ta bin for di Aruba. Nan lo t’ey durante e clausura di Bonaire Regatta 2023.
Pa mas detaye lesa TREMPAN
