John Kenneth de Haseth, acusa di violacion sexual contra di un mucha homber, a presenta den corte dia 20 di september ultimo. E dia ey el a bisa hues cu no ta berdad y el a pidi Corte pa anula e caso mirando cu ta palabra di e victima contra dj’e. Pero hues no a ker’e y a conden’e na castigo di prizon!
Ta acusa John de Haseth cu dia 23 di maart 2023 el a abusa sexualmente di un persona di su mesun sexo. Pa logra esaki el a tira algo den bebida di e victima, cu a pone cu e no por a resisti na e avancenan di e acusado.
John de Haseth, cu ta den libertad condicional cu loke ta un asina yama suspencion di su detencion, no a presenta den Corte na momento cu hues mester dicta sentencia den e caso aki. Asina mes hues a dicidi di dicta sentencia. El a repasa varios detaye di e investigacion, mustrando cu e victima na varios ocasion a pidi De Haseth pa no mishi cu ne pero cu e no a respeta esaki.
John de Haseth ta un politico, a participa den eleccion dia 25 di juni 2021 cu Partido Pueblo Prome, tabata candidato # 11 y a logra haya 8 voto individual. Den pasado a forma parti di e Grupo di 7. Ta acus’e di a comete e actonan aki manera presenta pa Ministerio Publico caminda e lo a busca e victima pa yuda su persona cu trabou na su apartamento pero aki e lo a duna e victima algo di bebe caminda e persona aki a bisa cu el a sinti su mes hopi marea.
Di e situacion aki De Haseth lo a probecha pa comete acto sexual den forma di sexo oral cu e victima y a pesar cu a pidie pa stop, e no a haci esaki. De Haseth ta desmenti tur acusacion.
A pesar di e ausencia di e acusado, hues a dicta sentencia. A haya e acusacionnan contra di De Haseth a keda comproba y pa e motibo aki a bay di acuerdo cu e demanda presenta pa fiscal, pa un castigo di dos aña di prizon.
Corte sinembargo no a anuncia cu e lo anula e suspension di e decision di aresto preventivo di John de Haseth y cu lo detene e acusado bek pa e bay sinta su castigo di dos aña cu hues a dicta.
Haseth tin dos siman pa apela e decision aki.
