E fin di siman aki mester a tuma luga durante tres dia un festival nobo riba e isla di Corsou, e asina yama Ponton Festival. E festival aki lo a trece artistanan grandi manera Ronnie Flex di Hulanda, Morgan Heritage di Jamaic, Jeon di Aruba, Ritch Calash y otronan.
Na comienso di siman caba, rumornan tabata core cu algun di e artistanan lo no bay presenta. Despues, organisadornan a anuncia entre otro cu un di e artistanan principal, Ronnie Flex, lo no bay presenta na Corsou, debi cu e organisacion no por cumpli cu algun di e exigencianan cu e artista tabata tin. Despues a sali un rumor cu un di e otro artistanan principal cu mester a biaha bin Corsou, a keda deteni na Schiphol, na caminda pa Corsou. E mesun dia si, e compania di maneho di e artista, a anuncia cu a logra di resolve e problema y e cu e artista ta bek den libertad. Tabata trata simplemente di un boet cu no a keda paga.
Pero, diahuebs mainta, organisadornan a yama un conferencia di prensa y a anuncia cu henter e festival a keda cancela, debi cu entre otro un di e artistanan principal no por ta presente, pero mas tanto e motibo mas principal ta e aceptacion di e publico di e festival no ta manera cu e organisadornan a spera. Es decir no a bende e cantidad di carchi necesario. Pa e motibo aki ta cancela e festival. Hopi tabata e comentarionan riba social media cu tabata hopi rabia cu e organisacion aki cu no ta traha na un forma no profesional. E publico ta pendiente pa sa con nan lo bay haya nan placa bek. Organisadornan a anuncia riba facebook cu otro siman lo bay cuminsa cu dunamento di placa bek, pero esey lo bay pasa den fase.
