E crisis cu Aruba ta pasando aden a causa di coronavirus tin su consecuencianan grandi riba e comunidad completo. Y no ta trata aki solamente di aspectonan financiero economico. E tin un impacto grandi riba e salud mental di e ciudadanonan.
Psicologo drs. Mitsy Willems ta splica cu momento cu un persona ta malo di Covid-19, e ta haye den un desesperacion. Den e estado aki un persona hopi biaha ta haci cosnan cu no ta corecto. Pero e consecuencianan ey no ta keda unicamente na momento cu nan ta malo. E ta un situacion cu ta continua na momento di recuperacion. “Bo ta haya hende cu no kier sali di cas, ta haya ansiedad of atake di panico (batimento di curason). Nan ta keda cu e miedo di contagia un biaha mas.”
Tin hende ta haya e contagio hopi suave y otronan ta haye pisa. E ultimo grupo aki ta haye cu e efectonan psicologico.
Personanan cu haya nan mes den isolacion, cu no por mantene contacto fisico cu otronan of cana liber, por yuda nan mes door di lesa buki y sigui cursonan online. “Ta hopi importante pa bo busca cos y actividadnan pa haci durante cu bo ta den isolacion y si bo no a haye pisa. Tin hende ta bira depresivo. Si bo stress ta hopi halto, bo sistema immuun por baha. E malesa ta dal bo mas duro. P’esey ta importante pa siña relaha. E ta yuda pasa e 14 dia di calvario cu e hendenan ta pasa aden.”
E apoyo ta hopi importante. “No rechasa un persona pasobra e tin Covid-19. Hopi biaha ta hala nan un banda y hasta door di famia cu tin miedo pa pega. Ta importante mustra cu bo kier yuda e persona, pasobra e ta pasando den un situacion malo. Kisas mandando mensahe di animo, pa e pashent no cay den depresion.”
Drs. Willems a bisa cu mester tin un cambio den tur persona, mester crea union (na nivel mundial), pa logra hopi. Ta papia entre otro di comportacion di cada persona, cu no solamente mester cuida su mes sino otronan. Cada persona mester haci cambio pa yuda su mes, na momento cu e sali pafo di cas. Esaki lo yuda tur hende, drs. Mitsy Willems a bisa.
