Na mei 2017 Fundashon Desaroyo i Progreso a kuminsá ku e proyekto ‘an Hour of Code’. Alrededor di 500 mucha na 23 skol a partisipá. Na tur e skolnan aki Fundashon Desaroyo i Progreso ta ofresé programa edukativo despues di skol.
E muchanan a sera konosí ku programashon di kòmpiuter den wega i na un manera grasioso. E manera di hasi esaki tabata den kuadro di un proyekto mundial pa siña mucha abilidatnan di siglo 20 manera pensa lógiko i buska solushon pa problema ku surgi.
E proyekto tabata repartí den 3 fase di mas o ménos 7 siman kada un. E promé fase a dura di mei te yüni 2017. Durante e periodo aki 82 mucha di grupo 7 i 8 na 6 diferente skol a partisipá. Tur siman di djaluna pa djaweps muchanan di un skol diferente tabata haña guia durante 2 ora pa nan siña programá hasiendo uso di un wega komputarisá optenibel riba e wèpsait di code.org. Muchanan tabata traha dos-dos riba un tablèt ku tabatin konekshon ku Internet. E delaster dia tabatin un kompetensia pa wak ken ta gana i 34 mucha a haña un sertifikado komo muestra ku nan a partisipá aktivamente i logra bon resultado durante henter e trayekto.
E proyekto Hour of Code a kana bon. Muchanan tabata entusiasmá i nan a sigui traha hopi independiente despues di algun instrukshon. Kaminda tabata nesesario nan a haña yudansa di dosentenan eksperensiá ku ya tabata guia e tipo di proyektonan aki pa 4 aña kaba.
Promé ku nan a kuminsá ku e programa lidernan di grupo di Fundashon Desaroyo i Progreso a partisipá ademas na un tayer pa siña kon nan mes por sigui guia muchanan den futuro, hasiendo uso di e mesun programa.
Muchanan a haña e tareanan un tiki difísil na kuminsamentu, pero nan a traha huntu i keda purba (trial & error) pa asina tòg nan logra kaba nan. E tablètnan tabata marka Samsung i nan tabatin un pantaya di 9.7 inch ku a sirbi bon i a usa Internet mobil ‘Digicel Myfi’ ku a traha perfektamente.
Resultado
Den e siguiente tabèl por mira pa kada skol kuantu mucha a partisipá na e proyekto i kuantu di nan a logra haña un sertifikado di ‘Hour of Code’ . Skolnan Atventista a sobresalí, nan tabatin e kantidat mas haltu di mucha ku a kaba ku éksito. Muchanan ku no a haña sertifikado di Hour of Code a haña un muestra di partisipashon.
| School | Deelnemers | Behaalde certificaten | |
| 9 mei t/m 12 mei | Kolegio Annie Koenraad |
10 |
6 |
| 16 mei t/m 19 mei | Skol Básiko Elis Juliana |
12 |
2 |
| 29 mei t/m 1 juni | Advent School Mahuma |
20 |
10 |
| 5 juni t/m 8 juni | Kolegio Sta Clara |
14 |
4 |
| 19 juni t/m 22 juni | Kolegio Dodo Palm |
16 |
4 |
| 26 juni t/m 29 juni | Advent School Koraal Specht |
10 |
8 |
Konklushon
E promé fase di e proyekto a kana bon i e organisashon a siña kiko ta kosnan ku por i kiko ta kosnan ku no por ora organisá un proyekto di tal índole. Un kantidat grandi di mucha, por ehèmpel, mester a surpasá nan falta di konosementu promé ku nan por a traha ku tablèt òf otro aparato digital. Esei a tuma tempu ku nan por a usa pa traha na e tareanan den kuadro di e proyekto ‘Hour of Code’ mes. Ta trata di un grupo basta grandi di mucha ku no tin aparato digital (kòmpiuter, lèptòp òf tablèt) i/òf Internet na kas.
