E proyecto di Watty Vos Blvd mester wordo vigila cu tur seriedad. E proyecto of e caminda ta hopi necesario. Awor aki ta un ader principal tin pa por yega e hotelnan. Esaki ta LG Smith Blvd. Ta mesun caminda cu tur dia tin filanan largo di auto sea mainta, durante dia of atardi.
E caminda cu ta pasa banda di Renaissance of Bestuurskantoor bay abou. Cu e Watty Vos Blvd e presion di trafico lo baha riba e caminda di LG Smith Blvd. Loke a tuma nota e dianan aki ta e problema cu e caminda ta causa pa trafico riba Watty Vos Blvd. Algun dia pasa habitantenan di Madiki Kavel a yama reclama pasobra e caminda nobo te yen di awa y hasta e awa a cuminsa acumula rond di nan cas drentando nan cura. No tin caminda pa e awa bay. E mesun problema aki a mira tambe aña nobo riba e caminda di Cumana. A traha un rotonde nobo. E rotonde a wordo traha poco halto y rond di dje e awa di yobida a bira manera un piscina.
Tanto pabou como pazuid di e rotonde por mira con autonan mester baha velocidad pa pasa cu tur cautela den e plas di awa. Un yobida mas pisa e por bira un problema mas grandi pa trafico. Pesey mes ta importante pa e contratista pone bon atencion pa esaki no keda asina. E ta conta pa otro areanan tambe cu e caminda ta pasa. DOW su team cu ta inspecciona tambe mester pone extra atencion pa e proceso di e proyecto. Importante pa ora e caminda importante aki keda cla, e no bira un molester pa motibo di awasero entre otro.
