“Como ciudadano consiente mi ta sigui e proceso di eleccion di parlamento 2021 cu hopi atencion”, asina un carta oficial dirigi na Minister Presidente y na Gobernador di Aruba, firma pa drs. Greg Peterson, ta inicia bisando. El a skirbi cu repasando tur documento, publica riba website censo.aw, el a tuma nota cu den articulo 10 paragrafo 2 di e Ley di Eleccion (Kiesverordening) tin stipula cu riba peticion di e partido politico cu ta participa na eleccion, lo mester duna e partido un copia (afschrift) di e registro di votado (kiezersregister). A mira cu a base di articulo 8, e registro aki ta contene nomber, fam, pais di nacemento, fecha natal y tambe adres y districto na unda e persona ta vota y si a ser exclui di derecho di voto.
“Como ciudadano di Aruba, mi ta disfruta di derecho fundamental di privacidad y proteccion di data personal segun articulo 8 di e tratado di Roma. Mi ta na altura cu mi tin e deber di registra na Censo pa pais Aruba tin data di su ciudadanonan pa por planea y pa como ciudadano mi por eherce cierto derechonan, manera esun di AZV. Mi sa tambe cu Censo ta proteha mi data personal contra di uzo pa cualkier otro meta cu ta esunnan stipula pa ley”.
“E 12 partidonan politico cu ta participa na eleccion 2021 por haya un copia di tur e data personal cu ta den e registro di votado a base di articulo 10 di e Ley di Eleccion. Kico e partidonan lo haci cu mi data personal? Nan lo uz’e pa e meta di articulo 10 so? Of nan lo uz’e tambe pa analisis cu no ta cuadra cu e meta di articulo 10? Kisas tambe e partido politico of su militantenan lo busca mi y otronan cu no a yega na urna electoral pa vota?”
“Mi ta considera e regla di articulo 10 un datalek legal y un atentado serio riba proteccion di mi bida priva y mi data personal. Mi ta di opinion cu e articulo di e ley aki ta causa un violacion innecesario di mi derecho fundamental protehi pa tratadonan internacional.
P’e motibonan aki, mi ta pidi Prome Minister como e minister responsabel y Gobernador como organo di Reino pa evita cu ta aplica e articulo 10 aki durante di e eleccion di 2021 y no duna e data personal na partidonan politico of no duna tur e data personal na partidonan politico. E data mas esencial cu mester nenga di comparti cu partidonan, ta mi adres. Ningun partido politico mester por sa unda mi ta biba y ken mas ta registra nan mi adres, sin cu esaki ta ser comparti boluntariamente di mi banda”.
“Mi ta spera cu mi peticion haya oido y cu proteha mi data personal y di tur esunnan cu derecho di voto aki na Aruba, contra di e uzo incontrolabel pa e partidonan politico”.
