Durante un lectura cu Arsobispo Charles Jason Gordon, memey di diferente lidernan religioso y participante, Prome Minister Mike Eman a expresa su gratitud cu e Arsobispo a acepta e invitacion pa comparti e reflexion moral di Iglesia Catolico tocante Inteligencia Artificial.
Den su introduccion, Eman a bisa cu e mundo ta busca sentido y direccion den un tempo unda tecnologia ta avansa rapidamente. Segun e mandatario, hustamente den e contexto aki ta importante pa tin un compas moral cu por guia e decisionnan cu nos ta tuma como sociedad. E charla a tuma luga diabierna mainta na Cas Veneranda.
Eman a explica cu e reflexion moral di Iglesia riba e tema aki no ta algo nobo, sino cu tin su origen den e Rerum Novarum di Papa Leo XIII, cu a responde n’e cambionan grandi cu Revolucion Industrial a trece. Aunke e revolucion ey a crea progreso economico, tambe el a trece problema serio manera trabou infantil, e condicionnan di trabou inhumano y falta di respet pa dignidad humano.
Pa motibo ey, Iglesia y e gobiernonan a cuminsa formula e principionan etico pa proteha hende. Durante su discurso, Eman a referi n’e filosofo Martin Buber y su concepto di “I and It”, caminda un relacion por keda solamente funcional y transaccional. Como ehempel, el a menciona e relacion entre un turista y un taxista, cu por evoluciona for di un simpel servicio di transporte pa un amistad berdadero ora personanan conoce otro, comprende otro y crea un conexion humano.
Tambe el a menciona e filosofo Emmanuel Levinas y su concepto di “The Other”, enfatisando cu un sociedad sano mester mira e otro persona como algo cu tin dignidad, deseo y aspiracion propio. Segun Eman, tecnologia no por haci cu nos ta perde e capacidad pa comprende otro hende ni pone distancia entre e personanan.
Prome Minister a señala cu precisamente pa motibo di e desaroyonan tecnologico rapido, Gobierno di Aruba a adopta e bienestar comun (the common good) como un di e principionan cu ta guia su politica publico. El a indica cu e concepto aki no por sobrevivi sin un fundacion moral fuerte, construyi pa famianan, comunidadnan, iglesianan y otro institucionnan social.
Na final di su introduccion, Eman a conta con e encuentro cu Arsobispo Gordon anteriormente a resulta den un dialogo tocante e bienestar comun. Ora el a lesa e enciclica nobo riba Inteligencia Artificial, el a mira e oportunidad perfecto pa invita e arsopiso Aruba y comparti e reflexion aki cu e lidernan y representante di diferente sector den nos comunidad.
