E empresarionan di turismo ta expresa preocupacion pa impacto economico y ta bisa cu falta comunicacion oficial cu a crea incertidumbre den e sector.
Jimmy Douglas, representante di Aruba Ariba Tours, a participa den e reunion publico tocante e tema di preservacion di naturalesa, indicando cu como operado di tour y miembro di Off-Road Foundation, tabata importante pa nan tende e discusion y expresa nan preocupacion. Segun Douglas, e sector turistico semper ta wordo señala den diferente ocasion como un factor cu por afecta naturalesa, motibo pa cual nan kier forma parti di e dialogo.
Un di e principal preocupacionnan ta e decision di Gobierno pa cera e ruta tras di California Lighthouse cu piedra, loke segun Douglas a afecta gravemente e companianan cu ta ofrece tour off-road. El a indica cu, te cu dia di awe, nan no a ricibi ningun comunicacion oficial splicando e decision, mientras cu diferente ministerio a indica cu no tin informacion tocante e asunto.
Douglas a enfatisa cu su presencia n’e reunion no tabata pa motibo politico, sino como un comerciante preocupa cu ta representa tambe e interesnan di hopi miembro di Off-Road Foundation. Segun e, ceramento di e ruta a crea un impacto directo riba e negoshinan, ya cu hopi compania tin contrato cu e cruceronan cu ta sigui valido entre 2027 y 2030. Despues cu e noticia di e ceramento a sali, algun cliente a cuminsa cancela e reservacionnan pasobra cierto caminda ya no por ta inclui den e tour.
“Nos unico comunicacion cu Gobierno ta ora tin impuesto pa paga na fin di luna,” Douglas a expresa, agregando cu ta falta un acercamento pa scucha e preocupacionnan di e sector y busca un ekilibrio entre proteccion di naturalesa y continuidad di e actividad comercial.
Di parti di Off-Road Foundation, Douglas a bisa cu nan ta sigui kere den dialogo y cooperacion como e miho caminda pa yega na un solucion. Sinembargo, si no tin apertura pa combersa, e fundacion no ta exclui tuma accionnan legal pa defende e derechonan di e empresarionan afecta.
Tambe George Vieira, propietario di George Cycle Rental, 49 aña di experiencia den e industria di tour, a expresa su descontento cu e manera cu nan a implementa e decision. Segun Vieira, hustamente e companianan di tour ta esnan cu mas interes tin den cuida e naturalesa di Aruba, pasobra esey ta e atractivo principal cu nan ta presenta na turista.
Vieira a critica cu e ceramento haci di un momento pa otro, sin consulta prome cu e sector. El a revela cu a manda diferente e-mail n’e minister responsabel, ofreciendo propuesta concreto y hasta un mapa cu un ruta alternativo unda tanto preservacion di naturalesa como e operacion di e tournan por coexisti. Te cu awo, segun Vieira, e comunicacion aki no a haya ningun respuesta oficial.
