Awe Minister Rocco Tjon a reuni cu e director nobo pa Departamento di Asuntonan Social, Rosanna van Dijk, kende entrante 15 di februari lo cuminsa cu su funcion nobo. E tin un trayectoria amplio den e tereno di psicologia y maneho di asuntonan social.
“Nos tin pleno confiansa cu Rosanna lo eherce un tremendo trabou y lidera Departamento di Asuntonan Social na su maximo potencial. Na mes momento nos ta gradici Tarsis Siera, cu a eherce e trabou mientras cu e funcion tawata habri”, asina e mandatario a indica awe.
Na aña 2018 ainda, Gabinete Wever Croes I, via Minister Rudy Lampe di Enseñansa a purba kit’e di su puesto di director di Bureau Multidisciplinair Centrum Aruba. Cuater aña despues, e mesun gobierno di MEP ta nombr’e den un otro funcion, e biaha aki na Departamento di Asuntonan Social. Y no por bisa cu ta Lampe, pasobra tur tumamento di personal of retiro ta pasa Ministerraad. Otronan si MEP a para, lagando Lampe cay.
Contal cu Rosanna van Dijk ta un academico bon prepara pa su funcion. E tabata director di Bureau Multidisciplinair Centrum Aruba for di aña 2016 caba.
Politicamente RED a persiguie y awe MEP ta promov’e pa un funcion mucho mas halto y cu hopi responsabilidad.
