Awe tardi pa 5:20pm a yama polis pa intermedia den un problema na e cas Alto Vista # 17-A. Parce cu un bisiña a kita coriente di e otro, lagando un pareha di edad respeta den scur! Un situacion masha inhumano, pa cual autoridadnan a purba tur forma pa intermedia pa trece paz y evita cu ta haci un mal hecho cu e grandinan.
E homber di edad a splica polis cu e doño di e tereno cu e ta huur a fayece y como tal su famia a bende e cas cu ta na banda. E situacion ta complica pasobra e cas ta traha riba un tereno erfpacht pero e tereno rond ta huurgrond. Y awo e persona cu ta biba na banda a bisa cu henter e tereno ta di dje, locual no ta berdad. E homber a cumpra e cas so.
E pareha di edad ta biba riba e tereno huurgrond, cu entretanto nan a parti den dos pida. Y a pidi na Elmar pa si por pone e meter di coriente na su banda pero Elmar no a logra hacie ainda. Awo e meneer cu ta biba na banda di e cas di e grandinan ta chercha di nan bisando cu nan ta riba su tereno y ta pone cantica duro mainta trempan pa lanta nan for di soño.
Como cu e meter di coriente ta riba tereno di e otro homber, pa maldad a dicidi di kita nan coriente awe. Consecuentemente tur cos den nan frigidaire a daña y laga e pareha grandi drumi sin coriente. Un abuso total!
Polis a papia cu e persona pero no kier coopera tampoco. E personanan di edad ta hende cu ta cobra pensioen. Ta pidi pa yudansa yega na nan urgente.