Director di Departamento di Aduana, Ricky Croes a raporta Edward Maduro, Presidente di Sindicato di Aduanero di Aruba (SADA) pa ta saca informacion confidencial y secreto di e deparatemento den prensa. E hefe ta sinti cu Maduro no por distingui su rol di sindicalista for di esun di un Duanero. Esey mes ta motibo dicon e tin un rapport awor riba su cabes y cu peticion na Minister pa dun’e un castigo disciplinario. SADA di nan banda no ta di acuerdo cu e medida y ta sinti cu mas bien kier silencia e sindicato.
Entretanto e rapport entrega na Edward Maduro a cay den nos “inbox” y ta mustra claramente cu Ricky Croes di Departamento di Aduana ta convenci cu no ta un biaha so, sino ta varios biaha tras di otro cu Edward Maduro ta sali papia di asuntonan delicado di Cuerpo di Aduana cu e no tin autoridad pa haci’e.
Rapport contra Edward Maduro (SADA)
Directiva di Departamento di Aduana no ta haya cu e por keda sconde tras di sindicato SADA pa asina menciona asuntonan manera si e scanner di container ta traha of no. E informacion ey ta masha delicado y no ta pa consumo publico. Di otro banda, e no tin nada di haber cu e posicion huridico ni asunto laboral di ningun trahado, pues nada pa e sindicato bay anuncia y haci baho mundo sabi.
Awor ta keda na Minister Xiomara Ruiz pa tuma un decision riba e peticion pa aplica un castigo disciplinario contra Edward Maduro. Awe mainta SADA a bishita Bestuurskantoor caba pa informa nan cu mayan mainta nan lo reuni cu nan miembronan pa tuma un decision kico lo bira nan siguiente paso. Den e carta di awe a copia Minister Presidente Wever-Croes tambe pa pone na altura di e situacion.
