Diaranson awo ta aumenta accijns riba gasolin

Minister di Finansa, Asuntonan Economico y Cultura, mr. Xiomara Ruiz-Maduro awe a manda un carta pa Departamento di Aduana instruyendo nan pa aumenta e tarifa di accijns riba gasolin cu 1.5 cen pa liter entrante diaranson awor dia 14 di november 2018. Esaki no tin nada si haber cu e tarifa internacional, sino e ta pa corigi e tarifa di accijns di prome cu luna di mei 2017 ora cu Gobierno anterior a reduci’e.

Dia 9 di mei 2007, Gobierno a adapta accijns riba combustibel, di cual a reduci accijns riba gasolin cu 10 cen pa liter mientras cu riba kerosin y diesel a baha tambe cu 5 cen pa liter. Na maart 2018, Gabinete Wever-Croes a adapta e tarifanan cu 2 cen pa liter riba gasolin, diesel y kerosin. Den e esfuerso aki lo no mishi cu diesel ni kerosin.

Minister Xiomara Ruiz a informa e departamentonan cu e lo instrui nan na caminda con mas adapta e tarifa di accijns. Si compara, awo a adapta gasolin cu apenas 3,5 cen di e 10 cen cu a bah’e aña pasa y cu awor Gobierno lo kier adapt’e bek na e tarifa original.

Mester menciona cu e aumento aki ta bin separa di adaptacion cu tin mensualmente relaciona cu tarifa di combustibel internacional cu sa afecta nos prijs local den forma positivo y tin biaha negativo.

Ta bon pa splica cu na cambio di aña Gobierno lo introduci mas cambio den nos sistema di impuesto, adaptando tarifa di cobransa riba accijns riba alcohol, manera cerbes, biña, y otro bebidanan sterki, banda di productonan di tabaco manera sigaria y sin lubida productonan di sucu. E Minister di Finansa a anuncia e cambionan aki adelanta algun siman pasa, aunke bo a menciona e nivel di aumento ainda. Hecho ta cu lo kier cobra miyones extra den caha di Gobierno riba e productonan aki, considera como di “luho”.