Aruba a keda un poco atrasa den era moderno, pero pronto lo dal un stap grandi. Ta bay bira posibel cu victimanan tambe tin un bos den casonan di corte.
Durante tratamento di casonan penal e siman aki, tabatin victima(nan) presente. Dado momento a puntra si tin algo di bisa riba e demanda, pero na momento cu a bay papia riba otro aspecto, hues a bisa cu esey no ta posibel.
Ley no ta permiti pa victima(nan of nan representante) hiba palabra. Den pasado a yega di sosode cu un hues a laga un victima papia y a permiti un abogado lesa carta di un victima. Pero e no ta conta mes den e proceso final.
Por a compronde cu rond di luna di maart, 2024 lo bini un cambio den esaki. E momento ey lo permiti victimanan hiba palabra, o sea dirigi nan mes na corte y tene na consideracion su ponencianan.
Abogado mr. Desiree Croes for di tempo e tabata den parlamento a papia di e necesidad pa duna victima mas poder.
Mester bisa si cu hopi a cambia ultimo tempo, entre otro di con pa atende cu victimanan. Ministerio Publico algun aña atras a bini cu un maneho unda ta duna atencion na e victima, scucha nan, y pone nan na altura ki momento nan caso lo bini dilanti. Y hasta ta bisa nan adelanta con e fiscal, cu e pruebanan disponibel por haci y kico por spera den un decision final.
Awo e parti di corte tambe ta bay conoce e cambio. Desiree Croes a expresa di ta sumamente contento cu ta bini un cambio. Na Merca e ta basta comun pa e victimanan ta papia den corte y na Hulanda esaki a drenta na vigor na 2005. E victima por expresa su dolor. Splica loke cu a pasa y con e ta sinti, kisas ta yuda den procesa e situacion.
Hasta a bira posibel na Hulanda, na 2016, cu e victima por bisa cu e castigo mester ta mas halto.
Un di e cambionan introduci den e Codigo Penal nobo ta cu via di e caso penal, den forma rapido, por haci un demanda pa daño material y inmaterial. Esaki ta un proceso mas cortico pero e suma cu por otorga ta limita na rond di 50 mil florin. Pero pa por bay di acuerdo cu e demanda, mester tin tur factura di gastonan relaciona cu e delito cometi, si ta destruccion p.e. loke a gasta pa drecha bentana of porta. Si ta un abuso sexual, kisas factura di tratamento di psycholoog of psikiatra y pildonan cumpra.
E victima, na momento cu inform’e cu e gasto ta bini dilanti, e ta haya un formulario pa yena y entrega na corte. Esaki mester bay compaña cu su respectivo recibonan. Ultimamente, segun mr. Croes, sa otorga suma di entre 5 pa 10 mil florin. E ta un avance cu pasado.
Mr. Desiree Croes ta abogado y prome cu esey e tabata miembro di parlamento y director di Cas di Aruba. Den su plan pa futuro cercano ta specialisa den derecho di victima(nan).
