Practica di deporte ta algo sano pa haci. Dokternan ta bisa practica deporte pa mantene un curpa saludabel. Lamentablemente COVID-19 ta causa cu na gran parti di mundo e practica di deporte a keda limita pa miedo di contagio. Despues cu a kita tur medida un luna pasa, awe Aruba ta hay’e cu un cantidad grandi di caso atrobe y un biaha mas ta bini cu medida y Protocol. Deportenan di contacto un biaha mas ta keda afecta.
Alberto Klaber, trainer di Taekwondo, a recorda cu nan delegacion tabata na Costa Rica pa entrenamento pa un competencia internacional y a haya nan mes obliga di bolbe Aruba. Aki na Aruba poco dia despues e practica di deportenan di contacto tambe a keda limita.
E situacion ta cu awor un biaha mas no por haci deporte di contacto. Klaber a mustra riba un competencia cu a tuma luga ayera na Korea cu a conta cu 3000 participante, tumando tur medida di precaucion (cu facemask). Despues di cada pelea tin limpiesa tumando luga. Mesun cos a tuma luga na Taiwan. Na Merca scolnan ta train normal, unda cu tin un sistema di airco cu cada tanto seconde ta filtra e sistema. Pero na Aruba a paralisa tur training.
E rumannan Klaber a keda train, pero e training general ta para te cu september ora cu nan ta cuminsa atrobe den preparacion pa eventonan internacional. “Ta keda na cada persona pa mira con nan ta protege nan mes di e miho forma y kisas entrenamento den aire liber lo ta bon.”
Un di e deportistanan den e area di Taekwondo ta Monica Pimentel di Impact Taekwondo, kende a expresa cu “lockdown” no tabata algo leuk.” E por a sinti e alegria ora cu muchanan a cuminsa train atrobe, principalmente nan sesionnan na lama. Esaki apesar cu nan tabatin training hasta via di zoom, pero no tin nada miho ora cu tur hende ta hunto. Na momento cu a reanuda e trainingnan den grupo, a haci esaki via di reglanan di DVG, teniendo cuenta cu distancia social y higiena.
Awor cu un biaha mas a bini cu e medidanan pa surgimento di otro ola di casonan di COVID-19, su unico pensamento ta “ban evita cu ta bini un “boom”, aunke cu ta dificil pa evita cu esaki ta plama. Nos lo kier pa e muchanan keda train, pero nos ta preocupa tambe cu nan salud. Por tuma mas medida durante training pa evita mas tanto posibel e contacto.”
