POR: Lo no reemplasa Marisol Lopez den Conseho di Minister

4661

Debi na e situacion financiero critico di Aruba, dor di e impacto di COVID-19, partido POR ta evalua pa no reemplasa drs. Marisol Lopez-Tromp como minister den Conseho di Minister. Como tal ta evaluando seriamente pa baha e cantidad di ministernan for di 8 pa 7 minister, manera cu MEP a priminti tres aña pasa den campaña electoral.

Mirando e impacto financiero sin precedente riba e finansas publico di Aruba dor di e pandemia COVID-19, Minister pa partido POR, mr. Andin Bikker y fraccion di Partido POR den Parlamento, parlamentarionan Alan Howell y Dellanire Maduro, ta di pensamento cu lo ta bon pa den interes general di Aruba, pa bay bek na 7 minister.

Alabes nan ta di pensamento cu lo ta bon pa reparti e peso di e cartera di e Ministerio di Desaroyo Teritorial, Infrastructura y Medio Ambiente riba diferente Ministerio den e Gabinete existente.

Cu esaki Partido POR lo atende e deseo di nos comunidad, partidonan di coalicion y plan di gobernacion di partido POR pa un gobierno di 7 minister. Den e dianan nos dilanti POR lo delibera riba e pensamento aki cu miembronan di coalicion, esta cu partido MEP y partido RED.