E matrimonio entre homber y muhe, ta reconoci door di Dios tanto na shelo como na tera, pasobra ta Dios mes a instrui matrimonio como un union di lealtad entre homber y muhe.
E no ta un contract cu fecha di vencemento, pero e ta un bida dedica na otro, entre un homber, un muhe y Dios.
Matrimonio ta e pilar social di un pais, pasobra di dje nos biba social ta depende, p’esey nos mester cuida matrimonio den tur aspecto.
Tur cos a cuminsa asina aki; Ora cu Dios a traha e muhe for di ribchi di e homber. E homber a bisa: Esaki ta awor wesu di mi wesunan y carni dimi carni, e lo wordo yama muher pasobra e a wordo traha for di un Homber.( Genesis 1:23).
P’esey e homber lo bandona su Tata y su Mama y lo uni cu su esposa y nan lo bira un carni.( Genesis 1:24).
Aki na mundo hopi ley a wordo cambia, pa complace hende, pa politica, pa competencia, pa malicia, pa chercha Dios, pa trece confusion den pueblo, y pa apoya e plan di diabel pa mara hende den pica di desobedencia y inmoralidad.
Pero un cos nos ta sigur cu nada no por cambia e proposito original cu tin eslableci den shelo.
Matrimonio entre homber y muhe ta berdaderamente funda riba amor, y no riba comfort , rikesa, etc.
For di un principio Dios a institui matrimonio como e fundeshi riba cual famia por wordo estableci.
Dios a diseña relacion sexual entre homber y muhe pa crea intimidad y tambe cual ta e unico forma den cual hende por wordo multiplica. ( Genesis 1:28).
Tur locual Dios a crea ta bon y ta perfecto, pasobra Dios a diseña e muhe su curpa pa carga yiu.
P’esey awe tur homber y muher uni den matrimonio por pone goso den nan matrimonio.
Respeta Otro: Un no tin nada mas bunita den un matrimonio, ora un pareha ta respeta otro den tur cos, pasobra respet ta trece amor, y cada un di nan ta haya mas gana di ta cu otro, respet ta trece confiansa, y ta un base di diamanta pa formacion di famia.
Trata otro bon:
Uni cu otro den tur locual ta boluntd di Dios.
Respalda otro den tur cos.
Para banda di otro den tu cos.
Den tempo bon y den tempo malo.
Cu placa of sin placa.
Cu trabao of sin trabao.
Den malesa y tristesa.
Yuda otro cu trabao di cas, ya cu trabao di cas no ta existi pa hende muhe solamente, pero tur hende cu ta biba den un cas mester tuma su responsabilidad y yuda otro mantene e cas.
Proverbionan :5:18 ta bisa : Laga bo fuente ta bendiciona y alegra bo den e esposa di bo hubentud.
Proverbionan 5:15 ta bisa: Bebe awa for di bo mes regenbak y awa fresco for di bo mes pos.
Esaki ta nifica cu fieldad matrimonial ta esencial, importante, primordial den nos bida, pasobra Dios ta balora fieldad matrimonial, locual Dios uni no laga ningun hende separa.
Siña pordona otro: Sea cariñoso cu otro, misericordioso, pordonando otro, mescos cu Dios den Cristo tambe a pordona boso.(Efesionan 4:32)
Esposo /esposa ta stima otro mescos cu nan propio curpa, ningun hende no ta odia su mes carni, p’esey violencia den matrimonio ta algo hopi tristo. Tur matrimonio ta sembra den goso, nan existencia ta den goso, nan biba ta simpel pero den goso, pasobra matrimonio original ta bini directamente for di Dios.
Sinceramente, Pastor Marcel Balootje.
