Diaranson mainta tempran autoridad ta pone man riba un sospechoso sumamente peligroso. Asina polis ta considera e persona aki. Nan tabata tin wowo riba dje.
Cuerpo Policial tin diferente departamento, no solamente uniforma, pero otro departamentonan manera di Recherche y otronan cu ta vigila hendenan cu ta wordo considera como criminalnan pisa, y hasta hendenan peligroso pa loke ta uzo di arma di candela. A base di sospecho y informacionnan cu nan tin, ya caba pa algun dia a cuminsa cu un buskeda di un persona di nacionalidad Colombiano. Den e caso aki, nan tabata su tras den e area di Rancho, despues di ya pa algun dia tabata tin wowo riba dje. Recientemente a haci un detencion caba cu Arestatieteam den e area di Rancho. Esaki a tuma luga den fin di siman. Esaki a sosode algo prome cu 6’or di mainta.
Ainda tabata falta hende pa detene. Pesey mes autoridad tabata tin wowo habri riba e movecion di e sospechoso aki. Bingo, nan a topa cun’e. Den Ranchostraat a cuminsa cu un vigilancia cu a sigui den diferente caya pasando banda di Hendrickstraat, De La Sallestraat, Kamerlingh Onnestraat, te cu refuerso di polisnan visibel, uniforma, cu auto di polis a yega den un forma espontaneo y asina ta blokia e auto cu e sospechoso peligroso aki aden, cu lo tabata hasta posiblemente arma cu arma di candela. Nan a logra bloki’e, bahe cu arma den man y asina pon’e plat na tera y finalmente arest’e y bay cun’e warda.
Recherche awor aki ta sigui cu un investigacion. Ta wordo sospecha cu e persona aki ta envolvi den un of otro atraco cometi riba nos isla. Sin cu e tabata sa, e tabata wordo vigila pa miembronan di Cuerpo Policial. Tremendo trabao. Pabien na Cuerpo Policial y awor aki ta over na confisca e auto. A Ristra henter e auto na e sitio, pero lo sigui ristra e auto pa posibel arma di candela y cualkier otro cos cu ta contra ley.
