Polis den silencio riba fugitivo peligroso

Mas cu 48 ora despues cu e asesino Eric Miguel Schneiders a huy di Warda di Polis di Sta Cruz, pueblo no a tende nada mas. Un situacion cu ta crea confusion, pa e silencio di autoridadnan, y miedo pa loke e fugitivo aki ta capaz di haci si e haya su mes den un situacion dificil. Tabata diadomingo ultimo, 14 di juli, cu autoridadnan a bati alarma casi 7’or di anochi cu un detenido sumamente peligroso a logra burla di siguridad na Warda di Sta Cruz y a haya su “libertad” sin cu camara di siguridad a constata esaki, ni e Polisnan ni e miembronan di CEA, kendenan ta responsabel pa lucht e detenidonan.
Loke cu a hala atencion ta cu a avisa pueblo di esaki casi tres ora despues, siendo cu ta trata di un persona sumamente peligroso, kende ta sintando un condena pa asesinato. Segun e datonan cu 24ora.com ta dispone di dje, no ta conoci exactamente e horario cu el a huy. Loke si sa ta cu awe e detenido / preso aki ainda ta fugitivo.
E diadomingo di e huida, helicopter tabata practicamente staciona den aire den bisindario di Warda di Sta Cruz, y Polisnan tabata coriendo rond den diferente tipo di auto. E siguiente dia, pueblo no a mira mucho movecion ni a tende di Cuerpo Policial kico ta haciendo pa trata di atrapa e preso. Despues a bira diamars y tampoco a tende nada di Cuerpo Policial. Pio, no a mira e helicopter ta bula mes sino te ora cu e bentanan di catochi a cuminsa anochi, cu circulacion di hopi placa mirando cu e premio di Mini Mega a pasa un miyon florin.

 

Pueblo ta hopi preocupa pasobra nan no ta hayando informacion y no ta mira un mobilisacion di miembronan di Cuerpo Policial en busca di e fugitivo. Ni OM no a saca nada di recompensa tampoco pa informacion cu por conduci na detencion di Schneiders, mirando cu Polis a bisa cu ta trata di un persona sumamente peligroso.
Peligroso pa motibo ademas di caso di atraco cu e tabata envolvi den dje, na februari aña pasa el a haya un castigo di 12 aña pa asesinato di un homber dilanti e club nocturno Olde Molen. E caso aki a tuma luga un aña prome, esta dia 21 di mei, 2017. El a tira riba e homber aki kende a fayece na e sitio mes. Despues di e sucedido el a huy, pa finalmente entrega su mes 9 dia despues.

Dicon cera awor:
Ni e hecho cu e tabata cera den KIA a stop su agresividad. Recientemente, algun siman atras, por corda cu tabatin un caso di hincamente. Un preso a keda seriamente herida. Investigacion haci a mustra cu Eric Schneiders tabata esun envolvi, pa cual a ordena su detencion y a cer’e na Warda di Sta Cruz, mientras cu ta investigando e caso y pa interogacion. Na momento cu el a huy, tabata falta algun dia so pa hib’e pa KIA. Tur cos ta indica cu el a planea pa huy prome cu nan hib’e pariba bek.
Con el a logra huy. Despues cu Schneiders a burla di henter e sistema di siguridad na Warda di Sta Cruz, a cuminsa un investigacion. Mas ainda con e por a logra haci esaki asina facil. A bin constata cu el a “zaag” un par di trali, cu sigur no ta trabou di un dia y sigur no durante e par di rato cu ta haya chens di lucht. Ta algo cu mester a bin ta tumando luga pa algun dia caba.
E siguiente pregunta ta, di con ni Polis ni personal di CEA no a mira su movecionnan. P’esey e investiga awo ta concentra tambe si Schneiders a logra huy riba su mes, of e por a haya ayudo di paden.

A purba awe di tur forma pa papia cu Polis pa haya mas informacion riba e buskeda tumando luga tras di e fugitivo pero sin ningun resultado. Vocero di Polis no tabata disponibel y a check cu Altocomisario cu na final a desvia prensa bek na e Vocero di Polis. E ultimo no a haya necesario pa suministra mas informacion na media riba e preso peligroso cu a huy for di Warda di Polis dos dia pasa y cu ainda ta fugitivo canando rond den pueblo.