Diaranson madruga, pa mas of menos 4:40, a tuma nota cu chauffeur di un Nissan March color preto, tabata core na un manera sospechoso riba caminda publico.
Polis a haci un señal pa e chauffeur por a para pa asina haci un ke otro control. Por a mira cu e chauffeur ta e conocido di polis S. y na banda di pasahero nan a tuma nota di e hoben T., kende tambe ta un conocido di polis.
A pidi e chauffeur S pa presenta un rijbewijs, pero e no por a cumpli cu esaki. Mirando cu S. no tin un rijbewijs valido, a pidi’e pa sali for di auto di biaha. Na momento cu el a sali for di auto, polis a ripara di biaha den e espacio banda di porta di e chauffeur, un cabito di sigaria, parecido na marihuana. Den cuadro cu esaki, a haci un investigacion na e pañanan di e chauffeur y e ocupante, alabes den e auto.
Durante e investigacion nan a bin haya bao di e stoel di e chauffeur tres saco di plastic chikito cu substancia parecido na marihuana. Tambe den su schoudertas preto, a bin haya varios biyete. Tambe a bin haya dos yabi kibra di auto den e tas. Den e schoudertas preto, di marca Calvin Klein di e hoben T., a bin haya un saco di plastic transparente cu cinco sakito transparente cu substancia parecido na marihuana.
Tur esaki a keda confisca y pasa pa UGC, cu lo sigui cu e investigacion.
Tambe a confisca e placa haya y pasa pa afpak team. E dos yabinan di auto tambe a confisca. E detencionnan ta den cuadro cu articulo 3 y 4 di Landsverordening Verdovende Middelen. Durante listramento, a bin haya den e boxer di e sospechoso S, algun saco di plastic transparente cu substancia parecido na cocaina, cu a keda confisca inmediatamente den cuadro di mas investigacion. Unabes na warda di Playa, e Sospechosonan S y T a presenta dilanti di fiscal auxiliar y despues deteni pa mas investigacion y interogacion.
