Diadomingo marduga despues di 5:00am, den cuadro di e accion Ristramento Preventivo di Polis, a para un auto na Noord. Ta trata aki di un auto marca Hyundai modelo Accent color blanco. Tabatin basta hende den e auto. Na momento cu e auto a stop, porta di pasahero a dal habri y un homber a sali na careda bay drenta mondi.
Locual e no a conta cune ta, cu den e patruya di Polis su tras, tabatin Polisnan hoben bon entrena pa “pustamento na pia”.
Polisnan a sali na careda y a gara e homber mesora. A detene mesora y den e prome interogacion a saca afor cu e homber ta permaneciendo ilegal na Aruba. El a bisa Polis cu e no kier regresa su pais pasobra e situacion eynan ta hopi malo.
Polis a hiba e homber pa Warda nos Costa pa nan sigui procesa su deportacion for di nos isla. Polis ta determina pa sigui controla y sigui deporta stranheronan cu ta scoge pa permanece cu un status ilegal riba nos isla.
Ilegalidad ta costa nos comunidad hopi placa: E empleadonan no ta aporta na impuesto, no ta aporta na SVb, ni na AZV y hopi biaha ta cobra menos cu nos empleadonan local, causando cu hopi Arubiano ta perde trabou.
