E mama cu a agredi un juffrouw di scol na St. Franciscus College a keda deteni. Ta trata aki di Maloshka Toppenberg. Esaki ta despues di un incidente cu a sosode dia 25 di Maart, caminda cu e persona aki a bin scol, pa motibo cu su yiu, kende lo mester a haci aña y a trece bolo scol pa algun mucha y e docente en cuestion, no a lage parti’e, mirando cu si tur no haya, ningun otro no lo haya. Esaki no a cay den bon tera cerca e mama, kende despues cu el a drenta den e oficina di e cabesante, a agredi e docente.
E juffrouw, un pensionado, a entrega keho. Esey a causa cu hopi docente a entrega un manifiesto expresando nan preocupacion cu e actuacionnan aki di mayornan.
Di parti di directorado di e scol, e cabesante di St. Franciscus College, a splica cu e mucha a haci aña dia 13 di Maart. E incidente a sosode dia 25 di Maart. E mucha, dia 22, esta diabierna, a trece cinco of seis pida bolo, pa e muchanan cu a haya straf pa motibo cu no por a bay un bustrip cu tabata tin e siman anterior.
Algun mucha cu mal comportacion y esnan cu no a paga schoolgeld, no ta sali pafo di scol cu nan. E mucha a bisa cu dia e haci aña, ta trece bolo pa e muchanan aki so. Dia el a haci aña e no a trece nada, a cana rond si haya su regalitonan y e diabierna ey, el a bin cu paar di bolo so y a bisa e juffrouw cu ta pa tal muchanan aki so e ta parti.
E juffrouw a bin cerca e cabesante pa puntra kico haci cu e bolonan. E cabesante a bisa cu no por parti pa algun so. A bisa cu ora e transport bin, duna e transport e bolo y si kier ta parti’e pafo cu e muchanan, pero den klas no ta haci’e y lag e otro muchanan afo.
E mama a bin su dialuna hunto cu su ruman na un manera masha fresco. E no a bisa nada mes riba bolo. Despues a bis’e pa papia den oficina. Eynan a cuminsa grita, e ruman tambe kier a drenta den oficina, pero e cabesante a bisa cu ta cu e voogd di e muchanan, cual ta e mama, so por drenta y papia den oficina hunto cu e señora di transporte.
Despues e mama a cuminsa yora bisa cu e ta gestressed, etc.. E cabesante interino a lag’e drenta den oficina pa papia. Pero manera el a drenta, el a bay directamente riba e juffrouw. Na ningun momento a papia mes.
E muchanan, despues di e incidente a keda scol, te cu diahuebs. E cabesante di e scol mes a pidi pa e cambio y SKOA a duna OK pa esey. Tabata peticion tambe di e mama, pa haci e cambio.
Awe mainta Polis a detene e mama como sospechoso di agresion na Warda di Polis na Playa. Husticia no ta tolera tipo di agresionnan asina pasobra e agresion tabata basta fuerte contra di e docente pensionado. Ta bon mes cu e ruman no a drenta tambe pasobra e ora e lo a bira un problema hopi serio. Recherche di Oranjestad ta investigando e caso.
Ley pa un ley pa tur
Alumnonan cu ta treat na scol, si no por treat henter e klas, no ta permiti pa treat cierto alumno so. Esaki ta un regla conoci na tur scol. E idea tras di e regla ta pa promove mas unidad y union den klas, den bes di promove separacion y discriminacion. No por parti pa 10 si y 20 no. Esey ta motibo cu no a laga e alumno specifico aki parti e 7 bolonan so pa su amigonan di klas. Si kier parti e bolo, ta parti’e pafo, ora cu scol caba.
E mama specifico aki tin 3 yiu bayendo e St. Franciscus College. SKOA a yam’e algun dia pasa y tabata buscando manera pa cambia e muchanan di scol. E mama ta bisa cu e juffrouw ta trata e muchanan malo. Pero e mama, kende ta un mama soltera, parce tin problemanan social.
