Polis a detene homber cu no kier a bay cas

3722

Ayera nochi lat, net prome cu 12:00am, Polis a presenta na Linear Park pa controla y sigura cu tur bar tabata cera y tur hende a bandona e sitio. Durante e proceso di control a bisa un homber pa bandona e sitio y asina a pasa bisa tur otro hende cu fiesta a caba y pa nan bay cas. Por lo menos un di esunnan cu a keda atras riba parkeerplaats a opta pa no bay mesora despues di e ordo di Polis. 

Polis a dal un ronchi bin bek y a bolbe pasa banda di e mesun homber y a constata cu e no a move. A deten’e mesora na e sitio. El a bisa Polis cu e no ta haciendo nada malo y cu el a start su auto caba pero cu e tabata solamente papiando cu su amigonan y e tabata cla pa bay. 

Asina mes e defensornan di ley no a tuma e splicacion aki como un argumento valido pa evita su detencion y a opta pa toch transporta e sospechoso pa Warda di Polis. Amigonan di e homber a hiba su auto cas p’e.