Parlamentario Rozendal pa medio di su plataforma ‘Un Man pa Nos Lanta Bèk’ i Kòrsou TIN Trabou, a bin ta organisá diferente kurso pa e hende siña traha CV, Karta di Solisitut i prepará pa e entrevista pa trabou na Sentro di Bario Otrobanda. Debí na e situashon di Covid e parlamentario a opta pa kuminsá ofresé e kursonan di forma virtual pa asina mas tantu hende por partisipá. Djarason último e promé seshon virtual a tuma lugá.
Rozendal ta hopi kontentu ku tabata tin partisipantenan di tur edat. “Ta great pa mira ku hóben i adulto mayó ta hasi uso di teknologia pa sigui e kurso. Tabata tin un bon interkambio ku e partisipantenan i e feedback tabata hopi positivo”.
Plataforma ‘Un Man pa Nos Lanta Bèk’ su meta ta pa yuda mas tantu posibel i empoderá nos hendenan riba e tereno laboral i personal. Ku e plataforma aki e Parlamentario ke duna un aporte i sigui kontribuí na bienestar di nos komunidat. Parlamentario Elsa Rozendal ta inisiadó tambe di e plataforma riba Facebook Kòrsou TIN Trabou, ku pa mas ku 6 aña ta fasilitá e buskadó di trabou ku vakatura, tep, konseho, lei laboral i tur loke tin di haber ku desayoro laboral i personal. Plataforma ‘Un Man pa Nos Lanta Bèk’ lo sigui ofresé diferente kurso pa nos hendenan den lunanan benidero.
