Dialuna 18 maart ultimo diferente organisacionnan den bario a bin hunto pa celebra nos dia nacional esta dia di himno y bandera den e bario di Piedra Plat.
E celebracionnan aki a cuminsa hopi aña pasa ora tabata celebra dia di La Reina den April y despues di tempo a cambia pa 18 maart. Organisacionan manera C.B. Piedra Plat, SV Britannia, Fundacion Centro famia Piedra Plat, Scol di musica Car Ritmo y Roller Skate Aruba a uni forsa pa haci e dia aki grandi.
E actividadnan a cuminsa for di mainta trempan cu un grandioso koffiemorgen, sigui pa cumindanan y cosnan dushi crioyo, weganan di futbol, weganan popular, benta di artesania, speeltuin, Dino Jump, roller skate pa mucha y adulto, presentacion di diferente gruponan musical y bailenan folklorico.
Banda di tur e facetanan cu tabata exitoso, e famoso balansamento di auto tabata e culminacion di e grandioso actividad aki den e bario di Piedra Plat.
Ta yama danki n’e patrocinadonan pa e apoyo ricibi di: Unoca, CEDE Aruba, Bo Botica Paradera, Compra NV, Setar y mucho mas y na tur e boluntarionan cu a traha incansablemente pa realisa e evento grandi aki celebrando nos dia nacional den bario di Piedra Plat.
