Reportero di 24ora a combersa cu Noemi Maduro cu ta funcionario na Departamento di Asunto Social, cu a elabora riba e anochi informativo “Cana hunto cu mi” organisa pa di dos biaha. Durante e sesion informativo a brinda informacion valioso pa e publico cu enfoke riba aspectonan di demencia y alzheimer.
Durante e anochi informativo tawata tin varios invitado presente cu a comparti informacion valioso entre otro: Miriam Illidge y Rosa Leon cu a trece nan experticio den e area di atencion y cuido di nos grandinan.
Ademas tawata tin presente organisacionnan cu nan standnan pa brinda informacion na e publico: Cas Marie, Wit Gele Kruis (WGK) , Sociale Zaken, Centro di Memoria, Telefon pa Adultonan Mayor 125, Love and Care, a conta cu presencia di Benjamin Security cu a lansa un producto “Personal Panic GPS” cu lo por yuda localiza un grandi cu ta sufri di dementia y a sali for di cas.
Maduro ta extende un cordial invitacion na dunadonan di cuido y publico general pa por asisti na e siguiente e anochi informativo na Centro di Bario Playa Pabao, diabierna 19 di April 2024 di 6.00 pm pa 9.30 pm, e anochi ta organisa pa Departamento di Asunto Social y Centro di Bario Playa Pabao.
