Diabierna mainta pa mas o menos 10:00AM ta cuminsa un persecucion den area di companashi pa dos sospechoso cu a resisti detencion na momento cu nan a “ Hit & Run” cu nan pickup den cura di Hotel The Chapel den De La Salle straat.
Informacion cu a compila ta indica cu e patruya a mira momento cu e picku a dal den e cura di e Hotel situa den De la Salle straat. Den e pickup tabata tin dos persona masculino. Momento cu patruya a baha pa atende cu e chauffeur a tuma nota di nan intencion pa cambia cu otro y asina ey laga e pasahero asumi responsabilidad di e accidente.
Mientras tabata atende cu e pasahero cu a cuminsa resisti detencion, e sospechoso cu realmente tabata na stuur a bula tras di stuur di e pickup y bandona sitio. Polis mes ora a activa y pidi demas colega pa bin reenforsa den e accion di persecucion.
Mientrastanto e otro sospechoso cu tabata resistendiendo cu polis a sali na careda y aki tambe a cuminsa un persecucion policial. A logra detene e prome sospechoso aki den cercania di Ecuadorstraat cu Argentinastraat na Companashi. E segundo detencion a tuma luga na rotonde di Ponton caminda a para e sospechoso cu a bandona sitio cu e pickup blanco.
Un di e sospechosonan aki no por a presenta ningun documentacion na sitio cu ta pone riba locual tin den nan contra caba. Bon trabou di polis a pone cu ambos sospechoso ta deteni.