Un ekipo di mas o menos 15 ambtenaar cu a presenta ayera na tereno di e compania cu ta procesando tur desperdicio di nos isla. Nos a bolbe acerca gerencia di EcoGas pero nan ta keda riba nan punto cu nan lo no reacciona riba cada comentario di Minister. EcoGas ultimo dianan ta blanco di critica di Gobierno, despues di a presenta un posibel solucion pa maneho di desperdicio riba nos isla, dor di exporta sushi procesa pa Colombia.
E siman aki Minister Otmar Oduber a manda e compania un carta relaciona cu supuesto dump cu nan lo a crea tras di nan tereno. Pero a resulta cu no ta ningun sorto di dump sino ta granulat deriva di reciclahe y separacion. Pero ta mas cu bisto cu diripiente, despues cu a anuncia nan idea pa exporta RDF cu mesora a start un persecucion contra e compania. City Inspector, cu siman pasa atrobe tabata na e sitio y a mira e tereno sin problema pa di tanto biaha den añas, awor despues di un siman a presenta cu si e ta un problema. Aunke Minister a copia nan den su carta, toch supuestamente nan no tabata na altura di e carta aki.
Aruba ta memey di un discusion riba e miho formula pa procesa desperdicio, cu un enfoke mas duradero y bon pa medio ambiente. EcoGas a pica padilanti cu un solucion cu a haya hopi acogida den comunidad y den e mundo di NGOnan. Tur hende ta habri pa un solucion cu ta bon pa nos medio ambiente, no ta costa mas y cu ta duradero. Den esey, procesa desperdicio, dor di recicla locual por uza bek y empaketa locual ta keda y exporta pa uza como combustibel (RDF) den fornonan di traha cement na Colombia, sigur ta un solucion. Locual comunidad kier sin duda ta elimina e dump y modernisa e forma con nos ta atende cu desperdicio.
Empresa multinancional ARCADIS a hasi un estudio di impacto Ambiental y Economico di varios alternativa pa maneho di desperdicio comercial y residencial. Exporta RDF of der’e den pits nan habri na Aruba a sali hopi mas favorabel cu kim’e den un “mass burn incinerator” manera Gobierno ta propone. E estudio aki a wordo manda pa tur Minister, tur Parlamentario y henter prensa di Aruba.
Gobierno sinembargo a presenta un idea pa bin cu un incinerator pa Aruba, cu lo costa algun shen miyon florin. Minister ta bisa cu Gobierno lo no inverti den dje, pero no ta habri pa bisa cu e pueblo lo hay’e cu un posibel triplificacion di e tarifa di procesa desperdicio. Di un caminda e inversion mester sali! De facto, aunke 16 compania a cumpra e “bestek” dunando indicacion cu nan ta interesa den e proyecto, ora a yega momento pa “bid”, niun no a participa!
Cu esey Gobierno a haya un señal cla cu ni e opcion cu nan a pensa cu lo ta interesante pa nos isla, esta pa kima sushi y produci coriente pa WEB, no tin sosten pasobra ningun compania a participa den e destaho. Probablemente nan a mira tambe cu tin mucho pregunta sin contesta of por lo menos sin un contesta convincente di Gobierno relaciona cu nan plannan ambicioso. Por ehempel pa saca placa di e inversion y pa por produci coriente, lo mester 100 mil ton di sushi pa aña, pero Aruba ta produci net mita di esey, despues di reciclahe. Ey ta un problema serio caba pasobra e proyecto ey no por produci e cantidad di coriente desea y consecuentemente lo no por bende cu WEB pa saca parti di nan inversion.
E otro reto ta cu politicamente no tin sosten unanime pa e proyecto tampoco. Imagina bin cambio den gobernacion, ken ta garantisa e inversionista cu e Gobierno nobo lo sigui cu e proyecto.
Cu tanto reto riba mesa, e siman aki Minister Otmar Oduber a start un ofensiva pisa contra MetaCorp y su compania subsidiario EcoGas. Di e forma aki e mandatario ta demostrando un posicion fuerte contra e compania netamente Arubiano y e centenares di trahadonan cu ta depende di nan pan di cada dia trahando na e companianan aki.
