E pensionadonan di Cuerpo di Brandweer di Aruba a reuni dia 10 di october den un encuentro amistoso di ex-coleganan, cu e meta di reuni mas ex-coleganan, comparti experiencia y fortalece e lasonan entre esnan cu a sirbi e cuerpo durante añanan.
Jaime Laclé, pensionado, a tuma e iniciativa pa reuni e ex-coleganan di Brandweer, cu e intencion di amplia e grupo pocopoco y, posiblemente, forma un asociacion den futuro. Durante e encuentro, e participantenan a comparti un momento di amistad riba e fecha cu nan kier reconoce como Dia di Pensionadonan di Brandweer, un dia despues di Dia di Bombero, cu ta cay dia 9 di october.
Comandante di Brandweer Aruba, Jair Tromp, a expresa su apoyo n’e iniciativa y a destaca e importancia di mantene contacto cu e pensionadonan, reconoce nan contribucion n’e cuerpo y na comunidad, y duna nan mas oportunidad pa participa den e actividadnan di Brandweer.
E iniciativa ta sigui su curso cu e meta di incorpora mas ex-coleganan den e grupo y fortalece e union entre e generacionnan di bombero.
