Dia 23 di mei 2018 lo cuminsa e caso penal contra ex-Minister di Asuntonan Social y Labor, Drs. Paul Croes. E caso aki ta grandi, den cual ta envolvi no menos cu 28 sospechoso. Ministerio Publico a duna e caso aki e nomber di “IBIS” y e Fiscal na cabes di e caso ta mr. Gerretschen.
Di parti di ex Minister Croes, su defensa ta den man di abogado Mr. Marije Vaders di Corsou y mr. Demis Illes di Aruba.
Ta bon pa menciona si cu desde un inicio a insinua cu Minister Paul Croes lo a duna mas o menos 2000 “ontheffing” y cu e lo a cobra un suma pa esaki. A papia di 130 compania inicialmente sospechoso. Pero, di nos informenan, Ministerio Publico awor lo presenta dilanti Corte cu solamente 11 compania sospechoso y no mas cu 3 compania di tramite. Esaki no ta kita e impresion cu a haci e caso “mas grandi” di locual e tabata na un inicio. Lo mester spera pa e caso pa tende cu exactitud kico Husticia tin contra e ex-mandatario y con Hues lo mira henter e investigacion den su contra. Hecho ta cu e caso aki, a influencia e resultado di eleccion Parlamentario na Aruba den gran forma aña pasa na September.
