Ta imposibel pa un hende mes por tin cosnan den su bida cu ta haci su mes malo y e no kier deshaci di e cosnan eynan,
E palabra di Dios ta bisa den Efesionan 4:27: Y no duna diabel oportunidad, E palabra di Dios ta bisa asina pa esnan cu henter ora ta rabia, y no kier pordona, cu ta biba henter dia ofende otro, pa asina nan laga los, y para keto pasobra ora falta di pordon ta den bo curason, diabel ta fiesta den bo bida, pasobra lo bo no tin paz te ora bo pordona di curason.( Mateo 18:35).
Pero awendia nos ta ripara cu hende a bira asina malo, manera ta para skirbi den 2 Timoteo 3:1-5, caminda nos ta mira hopi cla cu nos ta bibando den tempo trabahoso.
Hacido di maldad kier negocia. Bandido den otro paisnan kier negocia cu gobierno, pa nan keda cu un teritorio y asina keda haci nan maldad.
Asina tambe nos tin cu corda locual Hesus a bisa den Juan 10:10 cu e ladron ta bini pa solamente pa horta , pa mata y pa destrui.
Y si boso wak bon, e enemigo ta negocia den hende su bida, pero e hende no ta tuma cuenta di esey,
Ta mescos cu bo permiti un cacalaca drenta bo cas , y den un tempo record bo cas ta yena cu cacalaca.
E enemigo ta drenta cu algo chikito, pero despues henter bo mente y bo curpa ta bao di dominio di diabel, wak bon ora un hende cuminsa bebe, e ta dal un, e ta dal dos, y despues e no sa con e a yega cas, y tin cu hopi biaha no ta yega cas, pero ta yega warda di polis of riba un cama den hospital.
Mescos cu droga, e famoso slogan cu marihuana no ta haci nada, awel wak con nos hubentud ta comporta bao di influencia di droga, y bisa awor cu marihuana no ta haci nada. Wak cuanto tiramento y matamento ta tuma luga y te ainda tin hende cu ta negocia cu maldad y asina daña nan propio bida.
Ora un persona ta bay contra boluntad di Dios, e ta bay negocia cu diabel, pasobra esey no ta cos cu hende mester haci,
Ora un hende ta envolvi den redo, odio, maltrato, y ta laga su mes wordo uza pa haci daño na otro y comunidad e ta negociando cu diabel.
Tin hopi hende ta perde nan pas, nan no tin trankilidad, den nan curason, pesey nos tin tanto problema di salud mental, pasobra simplemente hende no kier laga los y despues di hopi tempo e cos ey ta bin afecta su mente.
Hende cu ta conseha bo pa bay contra otro, no ta hende cu kier bo bon ,un hende cu ta conseha bo bay contra bo propio famia, no ta hende cu kier bo bon.
Den Galationan 5:19-21 e palabra di Dios ta mustra cla cosnan cu yiunan di Dios no por participa den dje,pasobra hende no por hereda Reino di Dios negociando cu maldad.
Palabra di Dios ta bisa hopi cla: Laga e paz di Cristo goberna den boso curason, pa cual di berdad boso a wordo yama den un curpa, y sea gradicido. (Colosensenan 3:15).
Abstene di tur forma di maldad,(1Thesalonisensenan 5:22). Si nos wak bon maldad y inmoralidad ta busca tur manera pa goberna, y ta hende ta esun cu ta coopera, si hende no coopera, e enemigo no por haci nada.
A yega ora pa hende renoba nan mente y no coopera cu maldad.
Skirbi pa Pastor Marcel Balootje.
