Durante e debate riba e presupuesto supletorio, parlamentario Mike de Meza a anuncia di a dicidi sali di AVP y sigui su trabao den Parlamento como parlamentario independiente. E decision ta bin despues di un desacuerdo interno riba un mocion cu e tabata prepara pa aumenta salario minimo.
De Meza a splica cu e tema di salario minimo ta preocupa hopi hende, specialmente esnan cu tin un entrada limita. Segun dje, durante e campaña electoral di 2024, AVP a bishita diferente cas y a mira e situacion dificil den cua hopi famia y hende grandi tabata biba. E partido a compromete pa mehora poder di compra di e personanan cu entrada abou.
E parlamentario a bisa cu e tabata prepara un mocion pa aumenta salario minimo inmediatamente cu 200 florin, cu posibilidad pa amplia e aumento despues. El a propone un sistema similar na e reparatietoeslag di 2016, ora cu e tabata ocupa e puesto di Minister di Finansa. Segun de Meza su propuesta, e gastonan por a compensa, por ehempel, via belasting riba cifra di negoshi, pa evita cu e aumento afecta e empresanan.
Sinembargo, segun de Meza, e mocion no a yega na votacion. E ta afirma cu, prome cu el a tuma palabra, su fraccion a informa cu Minister Gerlien Croes a yama pa indica cu e propuesta no tabata aceptabel, pasobra e por a drenta na vigor dia 1 di januari 2027.
De Meza a relata cu AVP a retira e mocion despues cu FUTURO a indica cu e no lo apoya y cu e asunto por bira un punto di ruptura pa e coalicion. E parlamentario a critica e situacion, señalando cu, segun su opinion, un partido cu tres asiento den Parlamento no por dicta condicion na AVP, cu tin nuebe asiento.
Pa de Meza, e decision di retira e mocion ta contrario na e principio democratico cu e tabata spera di su partido. E tabata kier pa e mocion drenta na votacion y laga e mayoria di parlamento dicidi.
Decision pa sali di AVP
De Meza a confirma cu e desacuerdo a hiba na su decision pa sali di AVP. E a declara cu e partido cu e conoce no ta defende na e momento e principio democratico-cristian ni e interes di e personanan cu tin menos recurso.
E parlamentario a bisa cu e no kier sigui forma parti di un partido cu, segun su opinion, no ta duna prioridad na e necesidadnan di e pueblo, specialmente esnan cu ta lucha cu un entrada abou.
De Meza a anuncia cu e siguiente dia e lo manda un carta na presidente di Parlamento pa formalmente informa di su salida for di fraccion AVP y su decision pa sigui como parlamentario independiente.
