ELMAR a participa pa di dos aña consecutivo na FRED Job Fair & Conference, cu a tuma luga diasabra 24 di oktober 2026 na World Trade Center (WTC) Rotterdam, Hulanda.
E participacion aki ta forma parti di e esfuersonan di ELMAR pa atrae talento y crea oportunidadnan pa studiantenan y profesionalnan di Caribe interesa den un carera na Aruba.
E booth di ELMAR a conta cu un bon bishita durante e job fair, unda nan Team di Recurso Humano a conversa cu profesionalnan tocante vacaturanan di trabou pa 2026, como tambe oportunidadnan cu compania tin programa pa 2027.
Pa prome biaha, ELMAR a forma parti di un panel di discusion na FRED Expo, bou di e tema “Keeping the Island Running: Aviation, Energy & Tourism as Economic Engines.” E panel a brinda oportunidad pa intercambia ideanan y experiencia tocante e desafionan y oportunidadnan den sectornan esencial pa economia di Aruba, como tambe pa comparti esakinan cu e studiantenan y profesionalnan presente.
Cu su participacion na FRED Expo, ELMAR ta sigui crea conexion cu talento na exterior y stimula interes den oportunidadnan profesional den sector energetico di Aruba.
Interesa den un carera na ELMAR? Bishita nos portal di carera na career.elmar.aw pa explora oportunidadnan di trabou y descubri con bo por forma parti di e team di ELMAR.
