Salario digno ta un inversion den stabilidad familiar, independencia di hende muhe y futuro di nos yiunan
“Un hende cu ta traha full-time mester tin e posibilidad pa biba cu dignidad y cuida su famia sin biba constantemente den preocupacion financiero.” Cu e conviccion aki, parlamentario di AVP, Stephany Sevinger, ta expresa su apoyo pa mehora salario minimo y acerca esaki na e costo real di bida na Aruba.
Como mama soltero, hende muhe y representante di pueblo, Sevinger ta pone e bienestar di e hogar central den e discusion. “Como mama, mi conoce e responsabilidad di cria, cuida y ta presente pa bo yiunan. E experiencia ey ta haci mi reconoce con grandi e presion por ta pa un mama cu ta carga tur responsabilidad financiero di su hogar cu un solo salario minimo”, Sevinger a expresa.
Ora un mayor ta e unico sosten di un hogar, gastonan manera huur of hypotheek, cuminda, awa, coriente, transporte, scol y cuido di mucha mester sali di e mesun entrada. E cifranan di CBS pa september 2026 ta ilustra e reto aki. E bestaansminimum pa un hogar di un adulto cu un mucha ta aproximadamente Afl. 3.509 pa luna. Como referencia, e salario minimo mensual pa un siman di trabou di 40 ora ta aproximadamente Afl. 2.007. E comparacion ta mustra e distancia entre e salario y e suma calcula pa cubri necesidadnan basico di un hogar asina, prome cu tuma eventual toeslagnan of otro entradanan na cuenta.
Sevinger ta reconoce e importancia di e aumentonan den toeslagnan cu gobierno a introduci pa sostene famianan. Alabes, e ta señala cu pa algun hogar e apoyo ainda no ta suficiente pa absorba e presion di e costo di bida.
Un entrada miho por duna mas siguransa pa cumpra material escolar, cubri transporte y permiti un mucha participa den deporte, cultura of otro actividadnan cu ta contribui na su desaroyo.
“Tempo pa scucha bo yiu, yud’e cu huiswerk of simplemente ta presente tin un balor inmenso. Un salario digno por yuda reduci e necesidad di sacrifica e tempo precioso ey pa logra paga tur gasto na fin di luna,” Sevinger a expresa.
E ta destaca tambe cu un entrada suficiente ta fortalece e independencia economico di hende muhe. Specialmente pa mamanan cu ta carga cu e responsabilidad financiero y di crianza, mas siguridad den entrada ta duna mas espacio pa haci decisionnan den interes di nan mes y nan yiunan.
E ta considera un aumento di salario minimo como un inversion social y economico. Famianan cu mas poder di compra por sostene mas negoshinan local y participa mas activamente den economia. Alabes, e ta reconoce cu tur empresa tambe mester por sostene e cambio, y cu e implementacion mester wordo prepara cu dialogo y atencion pa nan realidad.
“Como mama y como parlamentario, mi kier mira cu progreso ta traduci den mas dignidad, mas trankilidad y mas oportunidad pa nos famianan. Prosperidad di Aruba mester cuminsa den nos casnan,” Sevinger a conclui.
