E manera cu bo educa bo yiu , ta refleha den henter su bida, ta depende di abo como mayor ki tipo di ciudadano lo cana den futuro riba nos isla. Educacion ta cuminsa na cas. Hopi hende no ta balora ni tuma tempo pa educa nan yiunan. Awo a bira cu nos ta haci un parti di educacion, y nos ta permiti telefon y ‘videogames’ haci e otro parti. Un parti pa caya haci y e otro parti nos ta kere cu scol mester hacie. Y si scol no hacie, autoridad lo hacie.
E ruta aki ta uno hopi tristo, y nos ta cosechando un fruta amargo, cu nos mester tin berguensa di dje. Bo ta tende tur dia, mi ta cansa, mi ta fada, e muchanan aki ta caba cu mi bida. Tur esey ta bini di e educacion cu abo a duna na e mucha.
Bo tabata cu sa educacion, tin mas balor cu placa, pasobra hopi hende su bida ta basa solamente, riba placa, cuanto nan tin, y kico nan tin,
Awel ora bo tin e pensamento ey bo ta pober y bo no tin amor. Como mayor bo no ta tuma tempo pa educa bo yiunan y nan ta bay sinti’e segun nan ta crece.
Nos por bisa kico cu nos kier, pero no laga ningun hende kere c’un mucha por educa su mes, sin atencion di mayor. Mucha mester conoce e diferencia di kico por y kico no por y esey ta solamente su mayor tin cu siñ’e for di chikito.
Un mucha mester siña pidi despensa,y for di chikito mester educ’e cu e no por haci un otro persona daño, pasobra esey no ta bon.
Falta di educacion ta pone mucha crece cu miedo, cu duda, defensivo, orguyoso, arogante,iresponsabel,y mas cu tur cos, e no ta respeta. Ora un mucha no ta respeta, e ta cera porta di bida, e ta kibra comunicacion, den caso cu tin hende cu ta desea di yud’e. E mes ta core cu nan cu su boca, pasobra e expresion cu ta sali, ta demostra cu e mes por tur cos y e no tin mester di ningun hende.
Mayor educacion ta educacion, y bon manera ta bon manera, y respet ta respet. Ningun di e cosnan no a bira moderno, sea e mucha ta educa, of e no ta educa.
Ta p’esey e palabra di Dios ta bisa pa tur hende lanta nan yiu den disciplina y instruccion di Señor, pero tambe e ta bisa pa no provoca bo yiu na rabia.
E conducta decente di mayor den cas tambe ta parti di educacion: pasobra hopi mayor ta kere cu nan por biba un bida con ta cu, sali for di cas, yega burachi, droga, bringa cu otro dilanti di e yiunan, menasa otro. Tin mayor cu ta hasta trata cu ‘byside’ dilanti di nan yiunan. Nan ta lubida cu tur esey ta e parti di educacion negativo cu nan ta transmiti.
Dicon hopi hoben no ta respeta otro, ta bringa, ta venga y hasta ta mata. Esaki ta bini di locual nan ta mira na cas, cual ta e parti violento den famia, y di e famoso weganan (videogames) cual ta costa hopi placa y arma cu ta facil pa yega na dje.
Na e mayor, Proverbio 19:18 ta bisa: Disciplina bo yiu mientras cu tin speransa ainda,y no desea cu morto.
Na e mucha, Proverbio 19:20 ta bisa: Scucha conseho y acepta disciplina, pa bo por ta sabi pa resto di bo bida.
