Ora un mucha ta chikito y e ta yora, ta dun’e un chupon pa asina e por calma, y e mucha ta bon, el a custumbra asina tanto cu e chupon cu e no por falta su chupon, si e perde su chupon, su mayor ta hay’e hopi pura pa busca un otro. E mucha y su chupon ta bira inseparabel, mientras cu e mayor tin mas tempo pa cas of su asunto personal, pero nos tur sa cu pidimento di chupon cerca un mucha ta pa motibo cu e tin hamber, of e mester di atencion di su mayor, y door cu e no por papia, e ta yora.
Den crecemento, tur mucha mester yora, pasobra yoramento ta parti di comunicacion pa busca cariño y atencion, ta solamente nos como mayor mester saca afo kico mas por ta presente cu ta pone e mucha yora.
Awendia un mucha ta crece y masha hende ta duna un mucha un tablet, pa asina e ta ocupa, pa e no molestia, y pa demostra cu e ta inteligente, y cu su tres of cuater aña e por maneha un tablet, pero e comunicacion y cariño su porcentahe ta baha, e tempo cu un mama ta saca un yiu for di su cama y carga e mucha y canta un cantica pa e bay soño a pasa, e mucha ta hunga cu su tablet te bay soño, y hopi biaha ta pasobra e tin hamber e ta yora, of ora su pamper ta yen, pero e atencion di mayor a mengua.
E mucha ta papia pero e no ta comunica, pasobra no tin tempo pa comunica cu ne, e ta papia cu su tablet, y ora e bateria di su tablet baha e ta tir’e for di su cama, e miho amigo di e mucha ta su tablet, sin su tablet e no tin trankilidad, pasobra su tablet a reemplasa cariño di mayor.
E ta mucha ta cera su mes y e no ta papia, e conoce su tablet hopi bon, y e mayor ta bisa cu e ta duna e mucha su tablet y e por haci tur cos cu e mester haci como mayor, pasobra e mucha stima su tablet, pero locual e no sa cu e tempo precioso cu e mester duna su yiu e tablet a hort’e.
Den pasado tabatin popchi pa mucha muhe y auto pa mucha homber, pero ningun di nan no tabata elocuente manera un tablet ta pa un mucha awendia, y tin hopi wega den un tablet y hopi mayor no sa mes ki sorto di wega tin den tablet. Y no ta tur mucha ta reacciona mescos riba cierto weganan.
Mucha ta bira mucha digitalisa, sin amor, sin comunicacion, pasobra tablet no ta hende.
Awo e mucha a sigui crece, y nos ta cumpra un telefon pe, pa asina e por comunica na prome luga cu nos como mayor, pero tambe nos a habri porta pa e comunica cu mundo, pasobra den un telefon awendia tin tur cos, y un mucha ta siña otro, e comunicacion cu abo como mayor ta kibra, pasobra hasta si un mucha no kier wak mesun programa di tv cu su mayor e ta wak otro cos riba telefon, y e mucha ta cera su mes e no ta papia, pasobra segun e mucha cu den su telefon tin tur cos cu e mester y e ta stima su telefon riba tur cos.
Awo ta falta di ken? Ken a bandona ken? Y ken a lubida su responsabilidad?
No lubida cu yiu ta regalo di Dios.
