Den su raportahe di luna di mei 2026, Aruba Tourism Authority ta mustra cu e crecemento mas fuerte den turismo di estadia na Aruba pa loke tabata luna di mei, no ta di hotelnan, esta ‘all-inclusive’ of ‘timeshare,’ pero den categoria di hotelnan chikito, huurnan priva di camber of AirBNB y Booking.com.
Te cu luna di mei, mas cu 267.000 bishitante a keda den e categorianan ariba menciona caminda un aña pasa esaki tabata casi 228.000, cual ta nifica un aumento di 17.3 %.
Esaki ta haci cu e categoria ‘otro’ ta crece mas lihe cu turismo di 10.4% na e mesun periodo pa 700.000 turista cu ta keda hospeda na Aruba.
Pa loke ta e cambio den e cantidad di anochi cu bishitantenan ta keda Aruba, esaki tambe ta evidente y hopi ta visibel den e rapport publica.
Bishitantenan den e categoria di huur priva, nan tur hunto tabata conta pa mas cu dos miyon anochi y cu esaki ta representa te cu casi 42% di tur e anochinan turistico na Aruba caminda den 2025, e parti ey tabata un tiki mas cu 39%.
CLASICO
E forma di acomodacion clasico,esta hotelnan, ta crece hopi menos caminda e cantidad di bishitantenan den ‘all-inclusive,’ a subi cu 3,3%, for di mas cu 90.000, pa mas cu 93.000. E cantidad di anochi den tur inclusive, a conoce un crecemento hopi leve di solamente 1,3%.
Pa loke ta e sector di “timeshare” aki tur cos a keda practicamente plat, caminda e cantidad di bishitante a aumenta c’un minimo di un porciento for di apenas mas cu 146.000 pa un total di 147.000. Tambe hotelnan di ‘European Plan,’ caminda e prijs ta inclui solamente acomodacion y no ta inclui e cumindanan, a bira mas fuerte caminda e categoria aki a subi na luna di mei di 2025 y a yega na casi 195.000 bishitante, cu ta un aumento di 13.2%.
Den anochinan cu nan tabata pasa, a supera mas cu 1 miyon anochi, cu ta un crecemento di 14.4% cu sin duda ta un cifra hopi impresionante.
OTRO TIPO
Aruba Tourism Authority den su rapport a inclui gran parti di e crecemento di turismo, den un categoria di acomodacion cu a ser yama como ‘otro’, cu ta e categoria di bishita di mas grandi pa Aruba.
Loke ta e acomodacionnan cu exactamente lo ta cay bou di ‘others’ no ta wordo aclaria den e rapport pero esaki lo por ta acomodacionnan mas chikito manera apartamento, villanan, private rental, tambe estadianan cortico of otro formanan di estadia cu no ta di hotelnan clasico, tambe resortnan all-inclusive y hotelnan timeshares.
E falta di claridad ey ta importante caminda e reportahe ta ilustra cu si e crecemento mas fuerte di turismo ta tumando luga for di e sector of circulo di hotelnan tradicional, e ta afecta directamente diferente aspecto den comunidad, manera entre otro e problema di pobresa, procesamento di permiso, impuesto, maneho di desperdicio, trafico y nivel di bida den e districtonan.
E reportahe di ATA entre otro ta lanta e pregunta riba e hecho cu no ta solamente cuanto Aruba ta ricibi di turista pero tambe unda nan ta keda y bou di cual supervision di e acogida cu nan ta cay bou di dje ta hunga un rol importante.
E cifranan ta mustra cu Aruba su turismo no solamente ta crece pero tambe ta bira mas popular y tambe ta cambia di forma.
E sector hotelero tradicional ta keda importante pero e dinamica di mas grandi ta den acomodacionnan pafo di e circulo tradicional di hotel y tambe tur sector “inclusive and timeshare.’
Pa gobierno y e sector di turismo esaki ta bira mas y mas dificil pa cual motibo ta mas importante pa tin indicacion concreto, di con grandi e alternativa pa e mercado di bishitantenan na unda e ta concentra y si tur ta bou di e mesun regla- y obligacionnan fiscal.news
