No duda pasobra Dios nunca lo cambia, den dj’E no tin sombra di cambio, Dios nunca ta laga nos bandona e a priminti, y nos sa cu tur locual Dios priminti, Dios ta cumpli.
No tene miedo di papia den Su nomber, pasobra den Su nomber tin poder y autoridad, tin gran bendicion pa tur esunnan cu ta kere den e nomber di Hesus.
Por ta den bo bida, hende por a faya bo, hende a lubida riba bo, y hende a bandona bo, pero ora bo hisa bo cara na laira y wak, sabi cu bo Dios, ta mesun caminda, e t’ey pa bo y e ta sostene bo.
Pasobra pa Dios, nada lo no ta imposibel (Lucas 1:37).
Si bo kere lo bo mira e gloria di Dios, no ta importa cuanto hende ta contra bo, no ta importa si hende chercha bo, Goliat a chercha y maldiciona David, pero e resultado final tur hende conoce pasobra David a kere den Señor y Señor a respalda David.
Daniel a bay cueba di leon, y den e cueba Dios a pone un angel pa cera boca di leon.
Den e tempo trabahoso cu nos ta bibando aden, nos ta mira con caracter di hende ta cambia, pasobra asina e ta para skirbi den 2 Timoteo 3:1-5, y hopi ta preocupa, kico lo bay pasa awo. Pero no lubida cu Dios nunca ta bandona esunnan cu ta kere den dj’E,
Esunnan cu ta kere y spera den Señor, nunca lo keda na berguensa.
Ni un di e bon promesanan cu Señor a haci na e cas di Israel no a faya tur a keda cumpli (Josue 21: 45)
Palabra di Dios ta bisa den Isaias 26:3-4 “ Lo bo warda den pas perfecto esun cu su pensamento ta permanece den bo, pasobra e ta confia den Bo.
Confia den Señor pa semper, pasobra den Dios e Señor nos tin un Baranca eterno.
Si nos duda den Señor, ta den ken nos lo kere, nos no por avansa di ningun manera si nos no tin confiansa den Señor (Juan 15:5).
Hopi hende awendia ta duna tur clase di enseñansa, pero loke ta falta hopi ta, instrui hende pa nan kere den Dios, kere cu Dios por, kere cu Dios ta capaz, kere cu Dios nunca ta yega laat.
Mescos cu David a bisa Salomon conoce e Dios di bo tata, asina cada un di nos como mayor mester instrui nos yiu. Pa e lanta cu confiansa den Señor, pasobra pa motibo cu hopi di nos hubentud no ta kere den Dios, no ta respeta Dios, no ta duna reverencia na Dios, nos ta cosechando hopi dolor.
Hoben nan ta tuma decision doloroso cu ta perhudica henter nan bida, pasobra un hoben cu mata na un edad bao di 20 aña a perde hopi cos, y e mester di guia firme, pa asina e por lanta ariba bek, gara na man di Señor y cana den caminda di Señor, y permanece den e caminda di Señor, pasobra awor e sa cu Señor lo no faya cu ne.
Awo mas cu nunca cu nos tur ta mira con maldad ta aumenta, con inmoralidad kier domina mundo, awor ta e tempo, pa lanta nos fe den Señor.
Pasobra esunnan cu ta kere den placa a faya,
Esunnan cu ta kere den politica a faya,
Tur esunnan cu ta kere den poder di hende,
Tur esunnan cu ta kere den nomber di hende lo faya, pasobra den ningun nomber, den ningun poder militar, no por compara cu e poder di Dios.
