Nos mester hala atencion di hopi famia, pa nan ta na altura cu palabra malo ta demotiva henter bo cas, descurashando bo yiunan.
No ta curasha ningun hende of motiva ora constantemente e ta tende solamente palabra negativo den su direccion.
Si un mucha no ta comporta su mes bon e no ta drecha cu palabra negativo, pero cu palabra positivo y amor di Dios bo ta trece bek riba e caminda drechi.
Awor esaki ta sabiduria di for shelo pa bo como mayor. Tur bondad cu abo kier mira sosode den bida di bo yiu, bo tin di proclama esey na tur momento. Pasobra dilanti di Dios bo palabra tin peso y cada palabra cu sali fo’i bo boca tin efecto riba bida di bo yiu.
P’esey den e buki di Efesionan capitulo 6:4 ta bisa lo siguiente: “Boso tatanan (mayornan) no provoca boso yiunan na rabia, ma lanta nan den e disciplina y instruccion di Señor.”
Den Mateo capitulo 3:17, Dios Tata a duna un les na nos tur bisando asina aki: “Y ata un bos fo’i shelo bisando: Esaki ta Mi Yiu stima den kende mi tin goso.”
Y nos tur por a mira con e bida di Hesus a bay dilanti, semper den comunicacion cu su Tata y den obediencia.
Y pa motibo di Su obediencia, den e buki di Filipensenan capitulo 2:9 ta para skirbi: “P’esey Dios a hals’E te den haltura y a duna Hesus e nomber cu ta riba tur nomber, cu pa e nomber di Hesus tur rudia mester dobla, di esunnan cu ta den shelo, riba tera y bao tera y cu tur lenga mester confesa cu Hesucristo ta Señor pa e gloria di Dios Tata.
Awor con por ta posibel cu tin mayor ta expresa nan mes bisando cu nan yiu no ta sirbi pa nada?
Prome cu bo haci un expresion asina como mayor, bo tin cu wak bo mes bon. Wak rond di bo y wak kico abo por a haci cu a pone cu bo yiu ta haci cosnan robes.
Pasobra ningun mata no por desbalora su propio fruta ni tampoco su simia.
Bo palabranan di bendicion ta habri porta pa bo yiunan. Ora Jacob a horta bendicion di Esau, Esau a puntra Isaac su tata si Isaac a warda un bendicion p’e, pasobra Esau conoce e balor di bendicion di su tata. (Genesis capitulo 27:36 y 38 )
Ora e yiu prodigio a pidi herencia y bandona cas, e tata nunca a expresa nada malo den su direccion, pero ora cos no a bay bon cu ne, e tata a tum’e bek na cas. (Lucas capitulo 15:19)
Expresando palabra ofensivo, negativo, sushi cu ta demotiva bo yiunan, abo como mayor ta cultiva un crisis familiar cu segun tempo lo bira parti di crisis social.
Como Mayor ban uni hunto den oracion y trece cambio den e situacion aki mas lihe cu ta posibel.
