Pa ta un pashent cu COPD tur dia ta un lucha. E seguro medico general, AZV, no ta kere den tratamento di Stemcell, aunke cu pa varios aña otro paisnan si ta kere. Na momento cu sinti y haya mehoracion, tin speransa pa sigui lucha. “Awe m’a nebulize despues di un siman! Door cu mi tin poco dificultad cu slijm. Sinembargo mi ta sinti mi super bon”, asina Nicole “Nathalie” Lin a indica. E ta un pashent di COPD pa algun aña caba y a pasa den varios reto cu su salud. Sinembargo, el a descubri cu uzando un tratamento di stemcell na Merca, ta mehora su calidad di bida.
No tin comparacion cu antes of miho bisa aña pasa. Su dokternan na Aruba mes ta asombra di con bon y stabiel e ta bayendo. Aunke den pasado un dokter a perde speransa y a mand’e cas bay muri den algun luna. Sinembargo cu fe y speransa e no ta ansha casi mas como tambe e mes por haci casi tur cos awor na cas (menos cushina).
“Pero e feeling aki ta awesome y mi tin hopi miedo di perde. Mi ta desea cu mas hende manera ami por haya e chens aki den bida pa un miho calidad di bida enbes di pas’e riba cama na cas of den hospitaal”, di acuerdo cu Nathalie Lin.
Hopi ta e preguntanan si berdaderamente tin mas hende manera Nathalie Lin cu e enfermedad di COPD. “Claro tin pero nos no ta wak nan pasobra nan ta hopi malo pa sali for di cas. Danki na Dios y na mi tratamentonan di Stemcell, mi por bisa mi a haya un otro chens pa biba y cu un bon calidad di bida cual ta e mas importante. Por cierto, mi tin casi tres aña alive and kicking y mi no a wordo hospitalisa manera tur pashent di COPD ta pasa aden. Mi ta gradici Dios tur dia cu mi ta na bida”, segun Nathalie Lin.
Awor falta 4 siman ainda pa e bay afor pa tratamento y e ta leu ainda di e suma pero speransa ta e ultimo cos cu mester perde manera su mama tabata bisa. “MI KIER BIBA y esey ta lo unico cu ta importante pa mi. Mi gana di biba ta loke tin mi na bida! Esunnan cu kier yuda mi por contact cu mi via mi facebook libremente Nicole Lin (Natalie) of tambe un stichting cu a lanta specialmente pa yuda tur pashent cu tin mesun situacion cu mi y cu no ta haña yudansa di AZV”.
Por haci un donacion na Stichting Yudami Hala Rosea Aruba via RBC bank # 7700000100261796. E fundacion ta inscribi na Camara di Comercio # s1743.0 mientras cu nan e-mail ta: [email protected]. Corda cu tur donacion ta yuda, sea con hopi of tiki e ta, pasobra hopi “tiki” na final lo monta y bira “hopi” pa toch duna Nathalie un bon chens pa sigui biba mas largo posibel cu un miho calidad di bida.
